މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ވިއްކާ ތެޔޮމަސްދަޅުގެ އަގު ބޮޑުކުރުމަށް ފަހު ކުރިން ވިއްކަމުން އައި އަގަށް މަސްދަޅު ވިއްކަން ފަށައިފިއެވެ.
މިކަމާ ގުޅިގެން މިފްކޯއިން ބުނީ, އެ ބަދަލު ގެންނަން ނިންމީ މެދުއިރުމަތީގައި މިހާރު ހިނގަމުން އަންނަ ހަމަނުޖެހުންތަކާ ގުޅިގެން، ދުނިޔޭގެ ބާޒާރުގައި ތެލުގެ އަގު އުފުލި، މަސްދަޅު އުފެއްދުމަށް ހިނގާ ޚަރަދުތައް މައްޗަށް ދިއުމާ ގުޅިގެން ކަމަށެވެ.
މިފްކޯ އިން ބުނެފައިވާ ގޮތުގައި، ހުސްވި މާރިޗު މަހުގެ ކުރިން 11.57 ރުފިޔާއަށް ލިބެމުން ދިޔަ ތެޔޮ ލީޓަރެއް މިހާރު ލިބެނީ 14.32 ރުފިޔާއަށް ކަމަށެވެ.
ތެލުގެ އަގު އުފުލުމުގެ ސަބަބުން ތެޔޮ މަސްދަޅެއް ވިއްކުމަށް އެ ކުންފުނިން ނިންމީ 18.50 ރުފިޔާއަށެވެ. ނަމަވެސް ތެޔޮ މަސްދަޅެއް ކުރިން ވިއްކަމުން އައި އަގަށް ވިއްކަން ނިންމީ ރައްޔިތުންނަށް ދިމާވެދާނެ ދަތިތަކަށް ބެލުމަށްފަހުގައިކަމަށް މިފްކޯ އިން ވަނީ ބުނެފައެވެ.
މިފްކޯ އިން އިތުރަށް ބުނެފައިވަނީ، މެދުއިރުމަތީގައި ހިނގަމުން އަންނަ ހަމަނުޖެހުންތަކާ ގުޅިގެން މުޅި ދުނިޔޭގެ އިޤްތިޞާދަށް ކުރިމަތިވާ ގޮންޖެހުންތަކުގެ ސަބަބުން އުފެއްދުންތެރިކަމުގެ ޚަރަދު ބޮޑުވެފައިވީ ނަމަވެސް، ރައްޔިތުންނާ ގުޅުން ހުރި ކަންކަމުގައި ރައްޔިތުންނަށް ފަސޭހަވާނެ ގޮތަކަށް ކަންކަން އިންތިޒާމު ކުރަނުންދާނެ ކަމަށެވެ.
