ކަނޑުމަގުން ރާއްޖެ އެތެރެކުރަން އުޅުނު ގިނަ އަދަދެއްގެ ވޭޕް ކާޓްރިޖްތަކެއް މޯލްޑިވްސް ކަސްޓަމްސް ސަރވިސްއިން އަތުލައިގެންފިއެވެ.
މި މައްސަލައާ ގުޅިގެން ކަސްޓަމްސް އިން ބުނެފައިވަނީ، މާލޭ ވިޔަފާރި ބަނދަރަށް ކައިރިކުރި ބޯޓަކުން ރާއްޖެ އެތެރެކުރަން އުޅުނު 1،940 ވޭޕް ކާޓްރިޖް އަތުލައިގަނެފައިވާ ކަމަށެވެ. މި މައްސަލަ އިތުރަށް ތަޙުޤީޤުކުރަމުން އަންނަކަމަށް ކަސްޓަމްސް އިން ވަނީ ބުނެފައެވެ.
ވޭޕާއި އީ-ސިނގިރޭޓް ރާއްޖެ އެތެރެކޮށް އޭގެ ވިޔަފާރިކުރުމަކީ މަނާކަމެއް ކަމަށް ސަރުކާރުން ވަނީ ކަނޑައަޅައިފައެވެ. ނަމަވެސް މަދުމަދުން ނަމަވެސް މިފަދަ މައްސަލަތައް ފެންމަތިވަމުން އަންނަކަން ފާހަގަކޮށްލެވެއެވެ. އެގޮތުން ރާއްޖޭގައި ވޭޕާއި އީ-ސިނގިރޭޓް މަނާކުރި ފަހުން ކަސްޓަމްސް އިން ވަނީ 70،000 އަށްވުރެ ގިނަ ވޭޕާއި ވޭޕްކުރުމަށް ބޭނުންކުރާ ސާމާނު އަތުލައިގަނެފައެވެ.
މިފަދަ ތަކެތި އެތެރެކުރުން ހުއްޓުވުމުގެ ގޮތުން ކަސްޓަމްސް އިން އަންނަނީ ވަރަށް ގިނަ މަސައްކަތްތަކެއް ކުރަމުންނެވެ.
