ގިނަ ދުވަސްތަކަކަށް ފަހު އަންނަ ހޯމަ ދުވަހު ރައްޔިތުންގެ މަޖިލީހުގެ ޖަލްސާތައް އަލުން ފެށުމަށް ހަމަޖެހިފައިވާކަމަށް ރައްޔިތުންގެ މަޖިލީހުގެ އިދާރާއިން ބުނެފިއެވެ.
ރައްޔިތުންގެ މަޖިލީހުގެ ޖަލްސާއެއް އެންމެ ފަހުން ބާއްވާފައިވަނީ ހުސްވި ރަމަޟާން މަހުގެ މެދުތެރޭގައެވެ. އެއީ މާރިޗު މަހުގެ އަށްވަނަ ދުވަހެވެ. އެހެންކަމުން ރައްޔިތުންގެ މަޖިލީހުގެ ޖަލްސާއެއް ބާއްވާފައި ނުވާތާ ގާތްގަނޑަކަށް އެއްމަސްދުވަސް މި ހަފުތާއަށް ވާނެއެވެ.
މި ހިނގާ 2026 ވަނަ އަހަރުގެ ރައްޔިތުންގެ މަޖިލީހުގެ ޖަލްސާތައް ފަށާފައިވަނީ ފެބްރުވަރީ މަހުގެ ފަސްވަނަ ދުވަހުއެވެ. އޭގެ ފަހުން ރައްޔިތުންގެ މަޖިލީގެ ޖަލްސާއެއް ބާއްވާފައިވަނީ އެންމެ ހަތަރު ދުވަހުއެވެ.
ރައްޔިތުންގެ މަޖިލީހުގެ ޖަލްސާތައް ކުރިއަށް ގެންގޮސްފައިނުވީ ނަމަވެސް، ކޮމިޓީތަކުގެ މުހިންމު ބައެއް މަސައްކަތްތައް މަޖިލީހުން ކުރިއަށް ގެންގޮސްފައިވެއެވެ. އެގޮތުން މަޖިލީހުގެ ކޮމިޓީ ބައްދަލުވުމެއް ހުސްވި މާރިޗު މަހުގެ 30 ވަނަ ދުވަހު ބާއްވާފައިވެއެވެ.
