ހޮނިހިރު ބޭއްވި ލޯކަލް ކައުންސިލް އިންތިޚާބު އަދި އަންހެނުންގެ ތަރައްޤީއަށް މަސައްކަތް ކުރާ (އ.ތ.މ) ކޮމިޓީގެ އިންތިޚާބުގައި އއ. ތޮއްޑޫގެ ކައުންސިލްގެ ހަތަރު ގޮނޑިއާއެކު ސަރުކާރުން ހިންގާ މައި ޕާޓީ ޕީއެންސީން ތޮއްޑޫގެ މެޖޯރިޓީވެސް ހޯދައިފިއެވެ.
ތޮއްޑޫ ފަހަގަވެގެން ގޮސްފައިވަނީ އެމްޑީޕީގެ ރަށެއްގެ ގޮތުގައެވެ. އަދި މިހާރު ހިނގަމުންދާ ކައުންސިލުގެ ރައީސް ހިމެނޭހެން 4 ކައުންސިލް މެންބަރުންނަކީވެސް އެމްޑީޕީގެ މެންބަރުންނެވެ. ނަމަވެސް މިފަހަރުގެ އިންތިޚާބުގައި ތޮއްޑޫއިން މިވަނީ ނަތީޖާ ބަދަލުކޮށްލާފައެވެ. މިއީ ޕީއެންސީއަށް ލިބުނު ތާރީޚީ ކާމިޔާބެކެވެ.
އިލެކްޝަންސް ކޮމިޝަން (އީސީ)ގެ ވަގުތީ ނަތީޖާއިން ދައްކާގޮތުން ތޮއްޑޫ ކައުންސިލް ރައީސް ކަމަށް އިންތިޚާބުވެވަޑައިގެންނެވީ ޕީއެންސީގެ ކެންޑިޑޭޓު އާދަމް ނަވީނެވެ. އޭނާއަށް 610 ވޯޓު ލިބިވަޑައިގަތެވެ. އަދި އެމްޑީޕީގެ ކެންޑިޑޭޓު ހަސަން ނަސީފަށް ލިބިވަޑައިގެންނެވީ 574 ވޯޓެވެ.
މީގެ އިތުރުން ތޮއްޑޫ ކައުންސިލު މެމްބަރު ކަމުގެ ދެ ގޮނޑިއަށް އިންތިޚާބުވެވަޑައިގެންނެވީ ޕީއެންސީގެ ކެންޑިޑޭޓުން ކަމަށްވާ މޫސާ އަނީލް އާއި، އަަލީ ރިޝާނެވެ. އަނީލަށް 597 ވޯޓު ލިބިވަޑައިގެންނެވިއިރު، ރިޝާނަށް ލިބިވަޑައިގެންނެވި 574 ވޯޓެވެ. އެ ދެ ގޮނޑިއަށް ދެން ވާދަކުރެއްވި އެމްޑީޕީގެ ކެންޑިޑޭޓުން ކަމަށްވާ އަހުމަދު ރަޝީދަށް 454 ވޯޓު ލިބިވަޑައިގެންނެވިއިރު، އަލީ އާޒިމަށް ލިބިވަޑައިގެންނެވީ 482 ވޯޓެވެ. ކައުންސިލްގެ އަންހެނުންގެ ޚާއްޞަ ދެ ގޮނޑީގެ ތެރެއިން އެއް ގޮނޑިއެއް އިންތިޚާބުވެވަޑައިގެންނެވީ ޕީއެންސީގެ ކެންޑިޑޭޓު މަރިޔަމް ސުޒީއެވެ. އޭނާއަށް 725 ވޯޓު ލިބިވަޑައިގެންނެވިއިރު، ދެވަނަ ގޮނޑިއަށް އިންތިޚާބުވެވަޑައިގެންނެވީ އެމްޑީޕީގެ ކެންޑިޑޭޓް އާމިނަތު މަޖުދާއެވެ. އޭނާއަށް ލިބިވަޑައިގެންނެވީ 514 ވޯޓެވެ.
ކައުންސިލް އިންތިޚާބުގެ ވަގުތީ ނަތީޖާތަކަށް ބަލާއިރު ރަށު ކައުންސިލްތަކުގެ ގޮނޑިތައް ކާމިޔާބުކޮށްފައިވަނީ ސަރުކާރު ހިންގާ މައި ޕާޓީ ޕީއެންސީންނެވެ. ނަމަވެސް، 5 ސިޓީގެ މޭޔަރުކަމާއި ކައުންްސިލްގެ މެޖޯރިޓީ ނެގީ އިދިކޮޅު އެމްޑީޕީންނެވެ.
