ޚަރަދު ކުޑަކުރުމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) ގެ ރަސްމީ މަސައްކަތު ވަގުތު މާދަމާއިން ފެށިގެން ކުރުކުރުމަށް އެ ކުންފުނިން ނިންމައިފިއެވެ.
މަޢޫލޫމާތު ލިބިފައިވާ ގޮތުގައި، މިފްކޯއިން ގެނައި މި ބަދަލަކީ، މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން އެ ކުންފުންޏަށް ކުރިމަތިވެދާނެ މާލީ ގޮންޖެހުންތަކުން އަރައިގަތުމަށް އެޅި ފިޔަވަޅެކެވެ. މިފްކޯއިން ވަނީ ރަސްމީ މަސައްކަތު ގަޑި ކުރުކުރުމުގެ އިތުރުން އެހެނިހެން ބައެއް ފިޔަވަޅުތައް އެޅުމަށް ވެސް ނިންމައިފައެވެ.
މިކަމާ ގުޅިގެން މިފްކޯގެ ސީނިއަރ މެނޭޖަރ ޕަބްލިކް ރިލޭޝަންސް ޝިފްޒާ މުސްޠަފާ ވިދާޅުވީ، އެ ކުންފުނީގެ ރަސްމީ މަސައްކަތު ވަގުތު ކުރުކުރުމުގެ ގޮތުން ހެނދުނު 08:00 އިން ފެށިގެން ހަވީރު 16:00 އާއި ހަމައަށް އޮންނަ އަށް ގަޑިއިރުގެ ރަސްމީ މަސައްކަތު ވަގުތު، ހަ ގަޑިއިރަށް ކުރުކުރުމަށް ނިންމާފައިވާ ކަމަށެވެ.
މިފްކޯގެ ރަސްމީ މަސައްކަތު ވަގުތު ކުރުކުރި ނަމަވެސް، ކުންފުނީގެ އޮޕަރޭޝަނަލް މަސައްކަތްތަކަށް އެއްވެސް އަސަރެއް ނުކުރާނެ ކަމަށާއި، އެގޮތުން މިފްކޯގެ ފިހާރަތަކުން އާންމުންނަށް ދޭ ޚިދުމަތްތައް މެދުކެނޑުމެއް ނެތި ލިބޭނެކަމަށް ޝިފްޒާ ވަނީ ވިދާޅުވެފައެވެ.
ރަސްމީ މަސައްކަތު ވަގުތަށް ބަދަލުތަކެއް ގެނައި ނަމަވެސް، މުވައްޒަފުންގެ އިތުރު ގަޑީގެ މުސާރައަށް އެއްވެސް ކަހަލަ ބަދަލެއް ނާންނާނެކަމުގެ ޔަޤީންކަން ޝިފްޒާ ވަނީ ދެއްވައިފައެވެ. ނަމަވެސް އިތުރު ގަޑީގެ މަސައްކަތް ކުރެވޭނީ، ކޮންމެހެން ކުރަންޖެހޭ މަސައްކަތެއް ކުރަންޖެހިގެން، ޚާއްޞަ ހުއްދައެއްގެ ދަށުންނެވެ.
