ދިވެހި ވަޠަނީ ޚިދުމަތުގެ ޕްރޮގްރާމުގެ ތިން ވަނަ ބުރަށް ކުރިމަތިލުމަށް ހުޅުވާލާފައިވާ މުއްދަތު އިތުރު ކޮށްފިއެވެ.
ދިފާއީ ވުޒާރާއިން ކުރި އިއުލާނެއްގައި ބުނެފައިވަނީ ވަޠަނީ ޚިދުމަތުގެ ތިން ވަނަ ބުރުގައި ބައިވެރި ވުމުގެ ސުންގަޑި އެޕްރީލް ހަތް ވަނަ ދުވަހުގެ 14:00 އަށް އިތުރު ކޮށްފައިވާ ކަމަށެވެ.
ޑިފެންސް މިނިސްޓްރީން ކުރި އިއުލާނެއްގައި ބުނީ، މި ޕްރޮގްރާމަށް އުމުރުން 16 އަހަރު ފުރި 28 އަހަރު ނުފުރޭ ފުރިހަމަ ސިއްހަތެއްގައި ހުރި ފަރާތްތަކަށް ކުރިމަތިިލެވޭނެ ކަމަށެވެ.
ދިވެހި ވަޠަނީ ޚިދުމަތުގެ ޕްރޮގްރާމް (މޯލްޑިވްސް ނޭޝަނަލް ސަރވިސް) ގައި ބައިވެރިވުމަށް އެދޭ ފޯމު ޑައުންލޯޑުކޮށް މުއްދަތު ހަމަވުމުގެ ކުރިން ހުށަހެޅުމަށް މިނިސްޓްރީން ވަނީ ހަނދާންކޮށްދީފައެވެ.
ދިވެހި ވަޠަނީ ޚިދުމަތުގެ ޕްރޮގްރާމު (މޯލްޑިވްސް ނޭޝަނަލް ސަރވިސް) ގައި ބައިވެރިވުމުގެ މުއްދަތު އިތުރުކުރުން pic.twitter.com/2axuXSUOXG
— Ministry of Defence (@MoDmv) April 5, 2026
ވަޠަނީ ޚިދުމަތުގެ ޕްރޮގްރާމަކީ ދިވެހިރާއްޖޭގައި މުޅިން އަލަށް ފައްޓަވާ ޕްރޮގްރާމެކެވެ. މި ޕްރޮގްރާމަކީ ދިވެހި ޤައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫހާނީ، އަދި ނަފްސާނީ ގޮތުން ދުޅަހެޔޮ ދިވެހި ރައްޔިތުން ބިނާކޮށް މަސައްކަތަށް އަހުލުވެރިކޮށް އަޚުލާޤު ރަނގަޅު ހަރުދަނާ ޒުވާނުން ބިނާކުރެއްވުމުގެ މަޤްޞަދުގައި ރައީސް ޑރ. މުޙައްމަދު މުޢިއްޒު ފެއްޓެވި ޕްރޮގްރާމެކެވެ. މި ޕްރޮގްރާމަށް ވަރަށްގިނަ ޒުވާނުންނާއި ބެލެނިވެރިން އަދި ރައްޔިތުންގެ ތާއީދު ބޮޑެވެ.
މި ޕްރޮގްރާމްގެ ފުރަތަމަ ބެޗުން، ބެޗުން 344 ޒުވާނުން ތަމްރީނުވެ މިދިޔަ އަހަރުގެ ޑިސެމްބަރު 28 ވަނަ ދުވަހު ދަސްވެނިވެފައި ވެއެވެ.
ފުރަމަ ބެޗުގެ ތަމްރީނަށްފަހު ހޮވުނު 65 ކުދިންގެ ދިވެހި ވަޠަނީ ޚިދުމަތުގެ ފަންނީ ތަމްރީނުތައް މި އަހަރުގެ ޖެނުއަރީ މަހުގެ 15 ވަނަ ދުވަހުން ފެށިގެން ބ.އަތޮޅު ކިހާދޫގެ ޓެކްނިކަލް އެންޑް ވޮކޭޝަނަލް އެޑިއުކޭޝަން ސެންޓަރުގައި ދަނީ ކުރިއަށެވެ. އަދި ފަންނީ ތަމްރީނަށް ނުހޮވުނު 241 ޒުވާނަކަށް ސަރުކާރުން ވަޒީފާ ހަމަޖައްސައިދީފައިވެއެވެ.
ތިން މަސް ދުވަހުގެ މި ޕްރޮގްރާމްގެ ތަމްރީން ފެށުމަށް ހަމަޖެހިފައިވަނީ މި އަހަރުގެ މެއި މަހުގެ ފަހު ހަފުތާގެ ތެރޭގައެވެ.
ތަމްރީނު ހިންގާނީ އެމްއެންޑީއެފް ކޮމްޕޮސިޓް ޓްރެއިނިން ސެންޓަރު ޅ.މާފިލާފުށިގައެވެ.
