އިއްޔެ އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބުގައި އދ. މާމިގިލިން ސަރުކާރު ހިންގާ މައި ޕާޓީ ޕީއެންސީގެ ކެންޑިޑޭޓުން ހޯދި ކާމިޔާބީއާއެކު ފުރަތަމަ ފަހަރަށް ޖުމްހޫރީ ޕާޓީގެ މެޖޯރިޓީ އެރަށުން ގެއްލުވާލައިފިއެވެ.
ދިވެހިރާއްޖޭގައި ސިޔާސީ ޕާޓީތައް އުފެދި ކައުންސިލްތައް ވުޖޫދުވުމަށްފަހު، މިއަދާއި ހަމައަށްވެސް މާމިގިއްޔަކީ ޖުމްހޫރީ ޕާޓީގެ ކޮންޓްރޯލްގެ ދަށުގައި އޮންނަ ރަށެކެވެ. ކޮންމެ ސަރުކާރެއް އޮތްނަމަވެސް މާމިގިލީގެ ކޮންޓްރޯލް އޮންނަނީ އަބަދުވެސް ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ އަތްޕުޅުގައެވެ. އެއީ ކޮންމެ ސަރުކާރަކާއެކު ކޯލިޝަން ބައިވެރިއެއްގެ ގޮތުގައި ހުންނަވާ އެ ދާއިރާ އަބަދުވެސް ޤާސިމްގެ އަތްމައްޗަށް ދޫކޮށްލަން ސަރުކާރަށް ކުރައްވާ ޝަރުތާއެކު އެކަން އެގޮތުގެ މަތީން އޮންނަ އޮތުމެވެ.
މިފަހަރު ޤާސިމްގެ ޕާޓީ ޖޭޕީން ވާދަކުރެއްވީ މާމިގިލި ކައުންސިލަށް އެކަންޏެވެ. އެހެން ދާއިރާތަކުން ތާއީދު ކުރެއްވީ ސަރުކާރުގެ ކެންޑިޑޭޓުންނަށެވެ. އެހެންނަމަވެސް ކުރިއާއި ޚިލާފަށް މިފަހަރު މާމިގިލިން ސަރުކާރުގެ ކެންޑިޑޭޓުންވެސް ކައުންސިލް އިންތިޚާބުގައި ވާދަކުރިއެވެ.
މިފަހަރުގެ އިންތިޚާބުގައި މާމިގިލީގެ ނަތީޖާއަށް މިވަނީ ބޮޑު ބަދަލެއް އައިސްފައެވެ. އިލެކްޝަންސް ކޮމިޝަންގެ ވަގުތީ ނަތީޖާ އައިއިރު ކޮންގްރެސް ޓީމުން މިވަނީ މާމިގިލީގެ މުޅި ތާރީޚު ބަދަލުކޮށްލާފައެވެ. ކައުންސިލް އިންތިޚާބުގައި މާމިގިލީ ކައުންސިލްގެ ފަސް ގޮނޑީގެ ތެރެއިން ދެ ގޮނޑި ވަނީ ޕީއެންސީން ހޯދާފަ އެވެ. އެއީ ޕީއެންސީގެ ކެންޑިޑޭޓް އަލީ ނިހާލް އާއި އަޒްލީނާ އިބްރާހިމް އެވެ.
މީގެ އިތުރުން މާމިގިލީ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ރައީސާގެ މަޤާމުވެސް ޕީއެންސީން ވަނީ ހޯދާފަ އެވެ. ތަފާތު ބޮޑުކޮށް އެ މަޤާމު ހޯދާފައިވަނީ ޕީއެންސީގެ ކެންޑިޑޭޓް ދިމްޝާ އަހްމަދު އެވެ. އަދި އެކޮމެޓީގެ މެންބަރު ކަމުގެ ދެ މަޤާމު ވެސް ޕީއެންސީން ވަނީ ކާމިޔާބު ކޮށްފައެވެ. އެއީ މަރިޔަމް ސަމާ އާއި އުއްމުކުލްޡޫމް އެވެ.
ޕީއެންސީން މާމިގިލި ދާއިރާއަށް ދެން ވާދަކުރި ކެންޑިޑޭޓުން ވެސް ވަނީ ގިނަ އަދަދެއްގެ ވޯޓާއެކު ވަރަށް ރަނގަޅު ނަތީޖާއެއް ހޯދާފަ އެވެ. އެގޮތުން ކައުންސިލްގެ ރައީސް ކަމަށް ޕީއެންސީން ވާދަކުރެއްވި ކެންޑިޑޭޓް އަޙްމަދު ނިޝާން އަށް ނާކާމިޔާބުވީ އެންމެ 12 ވޯޓްގެ ފަރަގުންނެވެ.
މިއީ ޖުމްހޫރީ ޕާޓީގެ ލީޑަރު ޤާސިމް އިބްރާހިމްގެ އުފަން ރަށުން ފުރަތަމަ ފަހަރަށް އެމަނިކުފާނަށް މެޖޯރިޓީ ގެއްލުވާލާ ޕީއެންސީން ހޯދި ތާރީޚީ މޮޅެކެވެ. ސިޔާސީ މަޝްރަހަށް އަންނަ ބަދަލަށް ނަޒަރު ހިންގާލާއިރު، ފަހަރުގައި މިއީ ޤާސިމަށް މާމިގިލީ ޒުވާނުން ދިން ވަރުގަދަ މެސެޖެއް ކަމަށްވުން އެކަށީގެންވެއެވެ.
ފާހަގަކޮށްލެވޭ ގޮތުގައި މިފަހަރުގެ އިންތިޚާބުގައި އެންމެ ގިނަ ކެންޑިޑޭޓުން ނެރުނު އެއް ރަށަކީވެސް މާމިގިއްޔެވެ. ޖުމްހޫރީ ޕާޓީއާއި، ޕީއެންސީ އަދި އެމްޑީޕީގެ އިތުރުން އަމިއްލަ ގޮތުން ވެސް ގިނަ ކެންޑިޑޭޓުން ވަނީ ކުރިމަތިލާފަ އެވެ. އޭގެ ތެރެއިން ޖޭޕީއަށް ކައުންސިލްގެ 2 ގޮނޑިއާއި އަންހެނުން ކޮމެޓީގެ 2 ގޮނޑި ލިބިފައިވާއިރު، އެމްޑީޕީއަށް ލިބުނީ ކައުންސިލުން އެންމެ ގޮނޑިއެކެވެ.
