ލޯކަލް ކައުންސިލް އިންތިޚާބު އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ހއ. ބާރަށުން އިދިކޮޅު އެމްޑީޕީއަށް ނޫނެކޭ ބުނެ ބާރަށު ކައުންސިލްގެ ހުރިހާ ގޮނޑިއެއް ވެރިކަން ކުރާ ޕީއެންސީއަށް ދީފިއެވެ.
އިލެކްޝަންސް ކޮމިޝަން (އީސީ) ގެ ވަގުތީ ނަތީޖާ ދައްކާ ގޮތުގައި ބާރަށު ކައުންސިލްގެ ފަސް ގޮނޑި ޕީއެންސީން ވަނީ ކާމިޔާބުކޮށްފައެވެ. އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ފަސް ގޮނޑީގެ ތެރެއިން ހަތަރު ގޮނޑި ކާމިޔާބު ކޮށްފައިވަނީވެސް ޕީއެންސީންނެވެ. އެކު ޖުމްލަ 9 ގޮނޑި ސަރުކާރަށް މިވަނީ ކާމިޔާބުވެފައެވެ.
އިންތިޚާބުގެ ކުރިން ބާރަށު ކައުންސިލްގެ ރައީސް ކަމުގެ ގޮނޑި ޕީއެންސީން ވަނީ ކަށަވަރުކޮށްފައެވެ. އެ މަޤާމު ކަށަވަރު ކުރީ އަލީ ޝަމީމެވެ.
ކައުންސިލް ގޮނޑިތައް ކާމިޔާބު ކުރީ އަލީ ރަޝީދާއި އަލީ ވަސީމާއި ފާތުމަތު އަރީކާ އާއި އައިޝަތު ސަމީޒާއެވެ.
އިއްޔެ ކުރިއަށްދިޔަ ލޯކަލް ކައުންސިލް އިންތިޚާބު އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގެ ނަތީޖާ މުޅިރާއްޖެއަށް ބަލާއިރު ގިނަ ގޮނޑިތަކެއް ނެގީ ވެރިކަން ކުރާ ޕީއެންސީންނެވެ. ނަމަވެސް، 5 ސިޓީގެ މޭޔަރުކަމާއި ކައުންްސިލްގެ މެޖޯރިޓީ ނެގީ އިދިކޮޅު އެމްޑީޕީންނެވެ.
