އިންތިޚާބުތަކުގެ ނަތީޖާއާއެކު ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވީ ޑިމޮކްރަސީގެ ރިވެތި ނަމޫނާކަމަށް ފިޝަރީޒް މިނިސްޓަރު އަޙްމަދު ޝިޔާމް ވިދާޅުވެއްޖެއެވެ.
މިނިސްޓަރު ޝިޔާމް މި މޭރުމުން ވިދާޅުވީ، އެކްސްގައި ޙިއްޞާކުރެއްވި ޕޯސްޓެއްގައެވެ. މިނިސްޓަރު ޙިއްޞާކުރެއްވި ޕޯސްޓުގައި ވިދާޅުވީ، ސިޔާސީ ޕާޓީއެއްގެ އެންމެ މުހިއްމު މަޤްޞަދުތަކުގެ ތެރޭގައި އިންތިޚާބުތަކުގައި ބައިވެރިވުމާއި، ބައިވެރިވާ އިންތިޚާބުތައް ކާމިޔާބުކުރުން ހިމެނޭ ކަމަށެވެ.
ސިޔާސީ ޕާޓީއެއްގެ އެންމެ މުހިއްމު މަޤްޞަދުތަކުގެ ތެރޭގައި އިންތިޚާބުތަކުގައި ބައިވެރިވުމާއި، ބައިވެރިވާ އިންތިޚާބުތައް ކާމިޔާބުކުރުން ހިމެނޭ. އިންތިޚާބުތައް ކާމިޔާބުވުމުގައި އަދި ނާކާމިޔާބުވުމުގައި ވަރަށް ގިނަ ސަބަބުތައް އެކުލެވޭ. އިންތިޚާބުތަކުގެ ނަތީޖާތަކަކީ އަބަދުވެސް ކަންކަމާ…
— Ahmed Shiyam (@Shiyamaldives) April 5, 2026
އިންތިޚާބުތައް ކާމިޔާބުވުމުގައި އަދި ނާކާމިޔާބުވުމުގައި ގިނަ ސަބަބުތަކެއް އެކުލެވޭކަން ފާހަގަކުރައްވަމުން ޝިޔާމް ވިދާޅުވީ، އިންތިޚާބުތަކުގެ ނަތީޖާތަކަކީ އަބަދު ވެސް ކަންކަމާ ފުންކޮށް ވިސްނާ، ކަންކަން އިޞްލާޙުކުރަން ލިބިގެންދާ ފުރުޞަތުތަކެއް ކަމަށެވެ. މީގެ އިތުރުން އިއްޔެ ބޭއްވުނު އިންތިޚާބުތަކުގެ ސަބަބުން ކުރަންވީ ކަންކަމާއި ނުކުރަންވީ ކަންކަމުގެ އިތުރުން ދާންވީ މަގު ސާފުކޮށް އެނގިގެން ގޮސްފައިވާކަމަށް ޝިޔާމް ވަނީ ވިދާޅުވެފައެވެ.
ރައްޔިތުން އެދޭގޮތަށް ސަރުކާރުން ރަނގަޅުކުރަންޖެހޭ ހުރިހާ ކަމެއް ރަނގަޅުކުރުމަށް މަސައްކަތްކުރައްވާނެކަމުގެ ޔަޤީންކަން ރައީސް މުޢިއްޒު ދެއްވާފައިވާކަން ފާހަގަކުރައްވަމުން ޝިޔާމް ވިދާޅުވީ، އިންތިޚާބުތަކުގެ ނަތީޖާއާއެކު ވެސް އެމަނިކުފާނު ދެއްކެވީ ޑިމޮކްރަސީގެ ރިވެތި ނަމޫނާ ކަމަށެވެ. ހަމައެހެންމެ، މި ސަރުކާރު އަބަދު ވެސް ދެމިއޮންނާނީ ރައްޔިތުން އެދޭ ބަދަލުތަކާއެކު ރައްޔިތުންނަށް ހެޔޮ ވެރިކަމެއް ކޮށްދިނުމުގައިކަމަށް ޝިޔާމް ވިދާޅުވިއެވެ.
މިނިސްޓަރު ޝިޔާމް ޙިއްޞާކުރެއްވި ޕޯސްޓުގައި، އިންތިޚާބުގައި ގޮނޑިތައް ކާމިޔާބުކުރެއްވި ހުރިހާ ކެންޑިޑޭޓުންނަށް ވަނީ މަރުޙަބާ ވިދާޅުވެފައެވެ. މީގެ އިތުރުން، އިންތިޚާބުގައި ނާކާމިޔާބީއާ ކުރިމަތިލާންޖެހުނު ކެންޑިޑޭޓުން ކުރެއްވި ހިތްވަރަށް މިނިސްޓަރު ވަނީ ސާބަސް ދެއްވައިފައެވެ.
