ލޯކަލް ކައުންސިލްތަކާއި އަންހެނުންގެ ތަރައްޤީ އަށް މަސައްކަތްކުރާ ކޮމިޓީތަކުގެ އިންތިޚާބާއި، ބޮޑު 2 އިންތިޚާބު އެކުގައި ބާއްވަން އިއްޔެ ނެގި ފެންނަ ނުފެންނަ ވޯޓުގައި ރައްޔިތުން ސަރުކާރުގެ ސިޔާސަތުތަކަށް ނޫނެކޭ ބުނެފައިވާ ކަމަށް، ރައްޔިތުން 2023 ގައި ނޫނެކޭ ބުނެ ވެރިކަމުން ބޭލުވި ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ސޯލިހު ”އެކްސް“ ގައި ރޭ ކުރެއްވި ޕޯސްޓެއްގައި އިންތިޚާބުތަކުގައި ކާމިޔާބު ހޯއްދެވި ހުރިހާ ކެންޑިޑޭޓުންނަށް މަރުހަބާ ދަންނަވައިފައެވެ. އަދި އެމްޑީޕީ ކެންޑިޑޭޓުންނަށް ވޯޓު ދިން ހުރިހާ ރައްޔިތުންނަށް ވެސް ސޯލިހު ވަނީ ޝުކުރު އަދާކުރައްވައިފައެވެ.
މިއާއިއެކު ސޯލިހު ވިދާޅުވީ ރައްޔިތުން މިއަދު މިވަނީ ސަރުކާރުގެ ސިޔާސަތުތަކަށް ނޫނެކޭ ބުނެފައި ކަމަށެވެ. ރައްޔިތުން މިއަދު އެ ބުނީ ސަރުކާރު ކުރިއަށްދާ މިސްރާބު ބަދަލު ކުރަން ޖެހިއްޖެ ވާހަކަ ކަމަށާއި ސަރުކާރުން ލަސްނުކޮށް ކުރަންވީ ކަމަކީ ރައްޔިތުންގެ އަޑު އަހައި ރައްޔިތުން އެދޭ ގޮތަށް ސިޔާސަތުތަކަށް ބަދަލު ގެނައުން ކަމަށް ސޯލިހު ވިދާޅުވިއެވެ.
މަރުހަބާ އެމްޑީޕީގެ (@MDPSecretariat) އިންތިޚާބީ މޭޔަރުން، ކައުންސިލު ރައީސުންް، ޑަބްލިއު ޑީސީ ގެ ރައީސުން އަދި އިންތިޚާބު ކާމިޔާބު ކުރެއްވި ހުރިހާ ކެންޑިޑޭޓުން. ވަރަށް ބޮޑަށް ޝުކުރިއްޔާ އެމްޑީޕީގެ ކެންޑިޑޭޓުންނަށް ވޯޓު ދެއްވި ހުރިހާ ރައްޔިތުންނަށް.
ރައްޔިތުން މިއަދު މިވަނީ…
— Ibrahim Mohamed Solih (@ibusolih) April 4, 2026
އިއްޔެ ކުރިއަށް ދިޔަ އިންތިޚާބުތަކުގެ ވަގުތީ ނަތީޖާތައް ދައްކާ ގޮތުން އިންތިޚާބުގައި ހުރިހާ ސިޓީއެއްގެ މޭޔަރުކަމާއި އަންހެނުންގެ ކޮމިޓީގެ ރައީސްކަން އަދި އެ ސިޓީތަކުގެ މެޖޯރިޓީ ވަނީ އިދިކޮޅު އެމްޑީޕީން ހޯދައިފައެވެ. އެހެންނަމަވެސް ގިނަ ކައުންސިލްތަކާއި އަންހެނުންގެ ކޮމިޓީތަކުގެ ގޮނޑިތައް ނެގީ ވެރިކަން ކުރާ ޕީއެންސީންނެވެ. އަދި ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއް ދުވަހެއްގައި ބޭއްވުމަށް ނެގުނު ފެންނަ ނުފެންނަ ވޯޓޫގައި ގިނަ ބަޔަކު ނިންމީ އެގޮތަށް ނުފެންނަ ކަމަށެވެ.
