ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ރައްޔިތުންގެ ނިންމުންތަކަށް ފުރިހަމައަށް އިޚްތިރާމްކުރައްވާ ނަމޫނާ ވެރިއެއްކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އަދި ކޮންގްރެސް ޕާޓީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
މެންބަރު ޝުޖާއު މި މޭރުމުން ވިދާޅުވީ، އިއްޔެ ބޭއްވި ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުތަކުގެ އިތުރުން ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމާ މެދު ރައްޔިތުންގެ ޚިޔާލު ހޯދުމަށް ނެގުނު ފެންނަ ނުފެންނަ ވޯޓުގެ ނަތީޖާއާ ގުޅިގެން ރައީސް މުޢިއްޒު އެކްސްގައި ޙިއްޞާކުރެއްވި ޕޯސްޓަށް ކުރެއްވި ކޮމެންޓެއްގައެވެ.
ޢިއްޒަތްތެރި ރައީސް.ރައީސަކީ ރައްޔިތުންގެ އަޑު ގާތުން އައްސަވާ،ރައްޔިތުންނާއި ގާތުން ޚިދުމަތްތައް ފޯރުކޮށްދެއްވުމަށް ލޯބިކުރައްވާ ވެރިއެއް.އަދި އެކަން އަމަލުން ދައްކަވަމުން ގެންދަވާ ވެރިއެއް.ރައީސަކީ ގިނަ ޕާޓީ އެކުލެވޭ ސިޔާސީ ނިޒާމަށް ފަރިތަ ޑިމޮކްރަސީއަށް ލޯބިކުރައްވާ… https://t.co/IO2FwfclLC
— Ibrahim Shujau (@IbrahimShujaau) April 4, 2026
އިއްޔެ ބޭއްވި އިންތިޚާބުގައި އިދިކޮޅު އެމްޑީޕީން ގިނަ ދާއިރާތަކެއްގެ ގޮނޑިތައް ވަނީ ކާމިޔާބުކޮށްފައެވެ. އަދި ފެންނަ ނުފެންނަ ވޯޓުގައި މެޖޯރިޓީ ރައްޔިތުން ވަނީ އިންތިޚާބުތައް އެއްދުވަހެއްގައި ބޭއްވުމަށް ނުފެންނަކަމަށް ނިންމައިފައެވެ.
މިކަމާ ގުޅިގެން ޝުޖާއު ކުރެއްވި ކޮމެންޓުގައި ވިދާޅުވީ، ރައީސް މުޢިއްޒަކީ ރައްޔިތުންގެ އަޑު ގާތުން އައްސަވާ، ރައްޔިތުންނާ ގާތުން ޚިދުމަތްތައް ފޯރުކޮށްދެއްވުމަށް ލޯބިކުރައްވާ ވެރިއެއް ކަމަށާއި، އެމަނިކުފާނަކީ ޢަމަލުފުޅުން ވެސް އެކަން ދައްކަވަމުން ގެންދަވާ ނަމޫނާ ވެރިއެއް ކަމަށެވެ.
”ރައީސަކީ ގިނަ ޕާޓީ އެކުލެވޭ ސިޔާސީ ނިޒާމަށް ފަރިތަ ޑިމޮކްރަސީއަށް ލޯބިކުރައްވާ ވެރިއެއް، މި ނިޒާމުގައި ރައީސް ތިޔަ ދައްކުވައިދެއްވީ ރައްޔިތުންގެ ނިންމުމަށް ވެރިޔަކު އިޚްތިރާމްކުރައްވާ މިންވަރު، އެއީ މާތް ސިފައެއް، އަޅުގަނޑުގެ ސިޔާސީ ހަޔާތުގައި ކުރިން މަސައްކަތް ކުރި ވެރިމީހާއަށް އެންމެ އުނދަގޫވެފައި އޮންނަނީ ރައްޔިތުންގެ ނިންމުމަށް އިޚްތިރާމް ކުރުމަށް، އޭގެ ބަދަލުގައި އެ ބޭފުޅާ އަންނަނީ ރައްޔިތުންދެކެ ރުޅި، ދައްކަވަނީ ފުސް މޫނު،“ – ޝުޖާއު ވިދާޅުވިއެވެ.
ޝުޖާއު އިތުރަށް ވިދާޅުވީ، ރައީސް މުޢިއްޒު ދައްކުވައިދެއްވި ރިވެތި ނަމޫނާއިން އެމަނިކުފާނު ރައްޔިތުންނަށް ކުރާ އިޚްތިރާމާއި ލޯބި ހާމަވެގެން ގޮސްފައިވާ ކަމަށެވެ. ރައްޔިތުންގެ ފަޅީގައި ރައީސް މުޢިއްޒު ކުރައްވަމުން ގެންދަވާ އިޚްލާސްތެރި މަސައްކަތްޕުޅަށް ކާމިޔާބީއަށް ޝުޖާއު ވަނީ ކާމިޔާބީއަށް އެދިވަޑައިގެންފައެވެ.
