މިއަދު ކުރިއަށް ގެންދިޔަ ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ އިތުރުން މައި ދެ އިންތިޚާބު އެއްދުވަހެއްގައި ބޭއްވުމާމެދު ރައްޔިތުން ދެކޭގޮތް ބެލުމަށް ނަގާ ފެންނަ ނުފެންނަ ވޯޓުލުން ކުރިއަށްގެންދިއުމަށް ކަނޑައެޅިފައިވާ ވަގުތު ހަމަވުމާއެކު ވޯޓުލާ ހުރިހާ މަރުކަޒުތަކެއް ބަންދުކޮށްފިއެވެ.
އިލެކްޝަންސް ކޮމިޝަނުން ބުނީ، ހަވީރު 17:00 އާއި ހަމައަށް ކިޔުގައި ތިބި ފަރާތްތަކަށް ވޯޓުލުމުގެ ފުރުޞަތު ދެވޭނެ ކަމަށާއި، ވޯޓު ފޮށިތައް ބަންދުކުރާނީ ކިޔުގައި ތިބި އެންމެން ވޯޓުލާ ނިމުމުން ކަމަށެވެ. ވަގުތު ހަމަވިއިރު ކިޔުގައި މީހަކު ނެތް ފޮށިތައް މިހާރު ވަނީ ބަންދުކޮށްފައެވެ. އިންތިޚާބުގެ ވޯޓު ގުނަން ފެށުމަށް ހަމަޖެހިފައިވަނީ ކޮންމެ ވޯޓު ފޮއްޓެއް ވެސް ބަންދުކުރާތާ 30 މިނެޓް ފަހުންކަމަށް އީސީން ވަނީ ބުނެފައެވެ.
މި ފަހަރުގެ އިންތިޚާބުގައި ތިން އިންތިޚާބެއް ބާއްވާފައިވާތީ، ނަތީޖާ އިޢުލާންކުރާނީ ވަކި ޚާއްޞަ ތަރުތީބެއްގެ މަތިންނެވެ. އެގޮތުން އެންމެ ފުރަތަމަ އިޢުލާންކުރާނީ ލޯކަލް ކައުންސިލްތަކުގެ އިންތިޚާބުގެ ނަތީޖާއެވެ. އެއަށް ފަހު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ ނަތީޖާ އިޢުލާންކުރާނެއެވެ. އެންމެ ފަހުން އިޢުލާންކުރާނީ ފެންނަ ނުފެންނަ ވޯޓުގެ ނަތީޖާއެވެ.
މި އަހަރުގެ ލޯކަލް ކައުންސިލްތަކުގެ އިންތިޚާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާނެއެވެ. އެހެންކަމުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށްވެސް ހަމަ އެ އަދަދަށް މެންބަރުން އިންތިޚާބުކުރުމަށް ވަނީ ހަމަޖެހިފައެވެ. މި އިންތިޚާބުގައި 2,962 ކެންޑިޑޭޓުން ވާދަކުރާނެއެވެ.
މި އަހަރުގެ ލޯކަލް ކައުންސިލްތަކުގެ އިންތިޚާބުގައި ވޯޓުލުމުގެ ޙައްޤު ޖުމުލަ 294,937 މީހުންނަށް ލިބިފައިވެއެވެ. އެއީ 144,527 އަންހެނުންނާއި 150,410 ފިރިހެނުންނަށެވެ.
