ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމަށް ތާއީދުކުރަންޖެހެނީ ކޮރަޕްޝަން ނައްތާލައި، މިހާރަށް ވުރެ ބޮޑަށް ޑިމޮކްރަސީ ހަރުދަނާކުރަންޖެހޭތީކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ކޮންގްރެސް ޕާޓީން އިންތިޒާމުކޮށްގެން ”ރައްޔިތުންގެ ބޮޑު ހިނގާލުން“ ގެ ނަމުގައި މިއަދު ކުރިއަށް ގެންދިޔަ ރެލީ ނިންމާލުމުގެ ގޮތުން ރަސްފަންނު ސަރަޙައްދުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ. ރައީސް ވިދާޅުވީ މައި ދެ އިންތިޚާބު އެއްދުވަހެއްގައި ބޭއްވިއްޖެ ނަމަ، ވަކި ޕާޓީއަކަށް ސުޕަރ މެޖޯރިޓީ ލިބުމުގެ ފުރުޞަތު ބޮޑުތަނުން ކުޑަވާނެ ކަމަށެވެ.
އެއް ޕާޓީއަކަށް ރައްޔިތުންގެ މަޖިލީހުގެ މެޖޯރިޓީ ލިބުމަށްވުރެ ގިނަ ޕާޓީތަކަށް ބެހިގެންދާ ގޮތަކަށް މެންބަރުން އިންތިޚާބުވެގެން ދިއުމަކީ އެންމެ ރަނގަޅު ގޮތް ކަމަށް ދެކެވަޑައިގަންނަވާކަމަށް ރައީސް ވަނީ ވިދާޅުވެފައެވެ. ރައީސް ވިދާޅުވީ މި ނިންމުމުގެ ސަބަބުން އެއްވެސް ފަރާތަކުން ސިޔާސީ އަމިއްލަ ފައިދާއެއް ނެގުމުގެ ފުރުޞަތު ކުޑަވެގެންދާނެ ކަމަށެވެ.
”އޭރުން އެންމެ ގިނަ ރައްޔިތުން ވޯޓު ލައިގެން އަންނަ މެންބަރުން އަންނާނީ، ކޮރަޕްޝަން ނެތިގެން ދަނީ މި ނިޒާމުގެ ތެރެއިން. ކޮރަޕްޝަން ނައްތާލުމަށްޓަކައި ވެސް ޑިމޮކްރަސީ ހަރުދަނާކުރުމަށްޓަކައި ވެސް. ނިޒާމު ހަރުދަނާކުރުމަށްޓަކައި ވެސް ޗެކް އެންޑް ބެލެންސް ނިޒާމު ހަރުދަނާކުރުމަށްޓަކައި ވެސް ކުރަންވީ ކަމަކީ މި ދެ އިންތިޚާބު އެއްދުވަހެއްގައި ބާއްވަން ނިންމަންވީ. އެއީ ޤައުމަށްޓަކައި އަޅުގަނޑުމެންނަށް ކޮށްދެވޭނެ ކަމަކީ،“ – ރައީސް ވިދާޅުވިއެވެ.
ކޮންގްރެސް ޕާޓީން މިއަދު ކުރިއަށް ގެންދިޔަ ހިނގާލުމުގައި ގިނަ އަދަދެއްގެ ބަޔަކު ބައިވެރިވެފައިވާއިރު މާދަމާ ބޭއްވުމަށް ހަމަޖެހިފައިވާ އިންތިޚާބުތައް އެ ޕާޓީން ބޮޑުތަނުން ކާމިޔާބުކުރާނެކަމަށް ބެލެވެއެވެ.
