ނިމިދިޔަ އެމްޑީޕީ ސަރުކާރުން ސުކޫކުގެ ގޮތުގައި ނަގާފައިވާ ފައިސާ ދެއްކުމާއެކު ޤައުމުގެ މުހިންމު ހަރުމުދާތަކާއި ޢިމާރަތްތައް ރަހުނުން ސަލާމަތްވެއްޖެކަމަށް ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ކޮންގްރެސް ޕާޓީން އިންތިޒާމުކޮށްގެން ”ރައްޔިތުންގެ ބޮޑު ހިނގާލުން“ ގެ ނަމުގައި މިއަދު ކުރިއަށް ގެންދިޔަ ރެލީ ނިންމާލުމުގެ ގޮތުން ރަސްފަންނު ސަރަޙައްދުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ. އެމަނިކުފާނު ވިދާޅުވީ، މި ސަރުކާރުން ވެރިކަމާ ޙަވާލުވިއިރު، އިޤުތިޞާދީ ގޮތުން ޤައުމު އޮތީ ފުން އަނދަވަޅެއްގެ ތެރޭގައި ކަމަށާއި، ބައިނަލްއަޤުވާމީ އިދާރާތަކުން ވެސް އެކަން ފާހަގަކޮށްފައިވާ ކަމަށެވެ.
މިދިޔަ ސަރުކާރުން ސުކޫކުގެ ގޮތުގައި ނަގާފައިވާ ފައިސާއަށް އަލިއަޅުއްވާލައްވަމުން ރައީސް ވިދާޅުވީ، ކުރީ ސަރުކާރުން އެ ފައިސާ ނަގާފައިވަނީ އޭގެ ކުރީ ސަރުކާރުން ނަގާފައިވާ 250 މިލިއަން ޑޮލަރުގެ ސަނީ ސައިޑް ބޮންޑު އަދާކުރުމަށާއި، މާލީ ގޮތުން އެއްވެސް ފައިދާއެއް ނުވާ ޚަރަދުތަކެއް ކުރުމަށް ކަމަށެވެ.
ސުކޫކުގެ ގޮތުގައި 500 މިލިއަން ޑޮލަރު އޭރުގެ ސަރުކާރުން ނެގީ މާލީ ބާޒާރުގެ އަގުތަކާ އަޅާބަލާއިރު ބޮޑު އަގެއްގައިކަން ފާހަގަކުރައްވަމުން ރައީސް ވިދާޅުވީ، އެ ފައިސާ ނެގީ އެ ފައިސާ އަނބުރާ ދެއްކޭނެ ހަރުދަނާ ސިޔާސަތެއް ވެސް ނެތި ކަމަށެވެ. އެގޮތުން ދަޢުލަތުގެ މުހިންމު ޢިމާރާތްތައް ރަހުނުކޮށްފައިވާކަމަށް ރައީސް ވިދާޅުވިއެވެ. އޭގެ ތެރޭގައި އައިޖީއެމް ހޮސްޕިޓަލާއި ދަރުމަވަންތަ ހޮސްޕިޓަލާއި، ފިނޭންސް ބިލްޑިންގގެ އިތުރުން އިސްކަންދަރު ސްކޫލް ހިމެނެއެވެ.
”މިދިޔަ ސަރުކާރުން ނެގި ސުކޫކު އަޅުގަނޑުމެންގެ ޤައުމު ދަރުވާނުލާ, އަޅުގަނޑުމެންގެ ރައްޔިތުންނަށް ލިބޭ އެއްވެސް އިނާޔަތެއް އުނިކޮށް, އެއްވެސް ފައިސާ ފޮއްޗެއް ޗާޕުނުކޮށް، ރެކޯޑް އަދަދެއްގެ ޤައުމީ ރިޒާވް ހާސިލުކުރުމަށް ފަހު އިއްޔެ އިރާދަކުރެއްވިއްޔާ އަޅުގަނޑުމެން ދައްކާ ޚަލާސް ކޮށްފިން,“ – ރައީސް ވިދާޅުވިއެވެ.
ރައީސް މުޢިއްޒު ވަޢުދުވެވަޑައިގެންނެވި ގޮތަށް ސުކޫކަށް ދައްކަންޖެހޭ 500 މިލިއަން ޑޮލަރު ދައްކާ ޚަލާސްކުރެވުމާއެކު ދަޢުލަތުގެ ހަރުމުދަލާއި ގިނަ ޢިމާރަތްތަކެއް ވަނީ ރަހުނުން ސަލާމަތްވެފައެވެ.
