ގްލޯބަލް ޑެސްކް – އާންމު ރައްޔިތުންނަށް ”ސްޓެގްފްލޭޝަން“ (Stagflation) ފަދަ ބަސްތަކަކީ ހަމައެކަނި ފޮތްތަކުގައި ލިޔެފައި ހުންނަ ޢިލްމީ އިބާރާތްތަކެއް ކަމަށް ހީވި ނަމަވެސް، ޙަޤީގަތުގައި މިއީ އިގްތިޞާދީ ގޮތުން ކުރިމަތިވާނެ ވަރަށް ބޮޑު ތަކުލީފެކެވެ. ސްޓެގްފްލޭޝަނަކީ އިގްތިޞާދުީ ގޮތުން ކުރިމަތިވެދާނެ އެންމެ ގޯސް ދެ ޙާލަތު އެއްފަހަރާ ކުރިމަތިވުމެވެ؛ އެއީ އިޤްތިޞާދީ ކުރިއެރުން ހުއްޓުމަކަށް އައިސް، ހަމައެއާއެކު މުދަލާއި ޚިދުމަތުގެ އަގުތައް އިންތިހާއަށް އުފުލުމެވެ.
މިއަދު މުޅި ދުނިޔެ މިސްރާބު ޖަހާފައިވަނީ މި ނުރައްކާތެރި މަޅީގެ ތެރެއަށް ވަނުމަށެވެ. ހޯރްމުޒް ކަނޑުއޮޅި ބަންދުވުމާއެކު، ތާރީޚުގައިވެސް ސަޕްލައި ޗެއިނަށް ނުވަތަ މުދާ ފޯރުކޮށްދިނުމުގެ ނިޒާމަށް ނާންނަ ފަދަ ބޮޑު ހުއްޓުމެއް އަންނަ މަންޒަރު މިދަނީ ފެންނަމުންނެވެ. ތަކެތި ޑެލިވަރީކުރާ ސައިކަލުން ފެށިގެން، އަތުގައި އޮންނަ މޯބައިލް ފޯނު އުފައްދާ ކާރުޚާނާތަކާ ހަމައަށްވެސް އެންމެ މުހިންމު އެއްޗަކީ ”ހަކަތަ“ އެވެ. މި ހަކަތަ ލިބުން ދަތިވުމާއެކު، ތަކެތީގެ އަގުތައް އިންތިހާއަށް އުފުލިގެންދެއެވެ. އާންމު އުސޫލެއްގެ ގޮތުން އިގްތިޞާދު ދަށަށްދާއިރު ތަކެތީގެ އަގުވެސް ދަށްވެއެވެ. ނަމަވެސް، މިފަހަރު ތެލާއި ގޭސް ލިބޭނެ މަގުތައް މުޅިން ބަންދުވެފައިވާތީ، މީހުންގެ ވަޒީފާތައް ގެއްލި އާމްދަނީ ދަށަށް ދާއިރުވެސް، ތަކެތީގެ އަގުތައް ހުންނާނީ އަތްނުފޯރާ ފަށުގައެވެ.
އާންމުންނަށް ކަމުއޮށިގެންވާ މުހައްލިލުން ދޭ އިރުޝާދުގެ ތެރޭގައި މިކަމަށް މިހާރުއްސުރެ ތައްޔާރުވުމަށް ބާރުއަޅައެވެ. މިއީ ވަގުތީ ގޮތުން އަންނާނެ ބަދަލެއް ނޫނެވެ. ކޮންމެހެން ނަގަންނުޖެހޭ ދަރަނިތައް ނުނަގައި، ހަކަތަ ބޭނުންކުރާ މިންވަރު މަދުކޮށް، ދިރިއުޅުމުގެ ޚަރަދުތައް ދިގު މުއްދަތަކަށް ބޮޑުވެގެންދާނެ ކަމަށް ސިކުނޑި ތައްޔާރުކުރާށެވެ. ”ހެޔޮއަގުގައި ހަކަތަ ލިބުނު“ ޒަމާން މިހާރު މިވަނީ ރަސްމީކޮށް މާޒީވެފައެވެ.
