މާލެ ސަރަޙައްދަށް ސަރުކާރުން އަލަށް ތަޢާރަފުކުރާ ޓެކްސީ ލައިންގެ ޚިދުމަތް ރަސްމީކޮށް ފަށައިފިއެވެ.
މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) މެދުވެރިކޮށް އޮޕަރޭޓްކުރާ ”މާލެ ޓެކްސީ“ގެ ޚިދުމަތް ފައްޓަވައިދެއްވީ އެކަމަށް ޓަކައި ހުޅުމާލޭ ސެންޓްރަލް ޕާކުގައި ރޭ ކުރިއަށްގެންދިޔަ ޚާއްޞަ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.
ޖުމުލަ 150 ކާރާއެކު ފެށި ޚިދުމަތުގެ ސަބަބުން ދަތުރުފަތުރުގެ ނިޒާމަށް އިންޤިލާބީ ބަދަލެއް އަންނާނެކަމަށް އެމްޓީސީސީން ޤަބޫލުކުރެއެވެ. އެގޮތުން މި ޚިދުމަތާއެކު މާލޭގެ އެތެރޭގެ ދަތުރުތަކަށް ޓެކްސީ ނުލިބޭ މައްސަލައަށް ދާއިމީ ޙައްލެއް ލިބިގެންދާނެކަމަށް އެމްޓީސީސީން ވަނީ ބުނެފައެވެ.
އެމްޓީސީސީން ބުނީ ޓެކްސީ ލައިންގެ ޚިދުމަތުގެ ފެންވަރު އިތުރަށް ރަނގަޅުކުރުމުގެ ގޮތުން އާންމުންގެ ޚިޔާލާއި މަޝްވަރާ ހޯދުމުގެ މަޤުޞަދުގައި އަންނަ ބުރާސްފަތި ދުވަހާއި ހަމައަށް މި ޚިދުމަތް މުޅިން ހިލޭ ދިނުމަށް ނިންމާފައިވާ ކަމަށެވެ. އެހެންކަމުން މި މުއްދަތުގައި އެފަދަ ޚިޔާލުތައް ދިނުމަށް އެމްޓީސީސީން ވަނީ އެދިފައެވެ. އެމްޓީސީސީން ބުނީ، މި މުއްދަތުގެ ތެރޭގައި 1655 ހޮޓްލައިން މެދުވެރިކޮށް ދަތުރު ބުކްކޮށްލުމުން އެ މީހަކާ އެންމެ ކައިރީގައި އޮންނަ ކާރެއް ހަމަޖައްސާނެ ކަމަށެވެ.
އެމްޓީސީސީން ބުނީ މި ދަތުރުތަކަށް ނަގާނީ ޓްރާންސްޕޯރޓު މިނިސްޓްރީން ރަސްމީކޮށް ކަނޑައަޅާފައިވާ އަގު ކަމަށެވެ.
