ހައުސިންގ ޑިވެލޮޕްމެންޓް ކޯޕަރޭޝަން އެޗްޑީސީން އުޞޫލާއި ޚިލާފަށް ހުޅުމާލެއިން ޕާކިންގ ސްލޮޓު ދޫކޮށްފައިވާ ކަމަށް ބުނެ ބައެއް ފަރާތްތަކުން ދައްކަމުން އަންނަ ވާހަކަތައް އެ ކޯޕަރޭޝަނުން ދޮގުކޮށްފިއެވެ.
މިކަމާ ގުޅިގެން އެޗްޑީސީން ނެރެފައިވާ ބަޔާނެއްގައި ބުނެފައިވަނީ، ހުޅުމާލެއަށް ދިމާވެފައިވާ ޕާކިންގ މައްސަލައަށް ދާއިމީ ޙައްލެއް ހޯދައިދިނުމަށް ސަރުކާރުގެ ސިޔާސަތުގެ ތެރެއިން އެ ކޯޕަރޭޝަނުން ވަރަށް ގިނަ މަސައްކަތްތަކެއް ކުރަމުން އަންނަ ކަމަށެވެ. އެ މަސައްކަތްތަކުގެ ދަށުން ހުޅުމާލޭގެ އެކި ސަރަޙައްދަތަކުން ޕޮކެޓް ޕާކިންގ ދޫކުރުމަށް، އެ ކުންފުނީގެ ވެބްސައިޓުގައި އާންމުކޮށް ހުޅުވާލައިގެން އިޢުލާނުކުރެވުނުކަމަށް އެޗްޑީސީން ވަނީ ބުނެފައެވެ.
އެޗްޑީސީން ބުނީ މި އިޢުލާނާ ގުޅިގެން ހުޅުވާލެވުނު ފުރުޞަތުގައި ވަރަށް ގިނަ ފަރާތްތަކުން ކުރިމަތިލާފައިވާ ކަމަށާއި، އުޞޫލުގެ ތެރެއިން އެ ފަރާތްތައް އިވެލުއޭޓްކޮށް. ޝަރުތުހަމަވި މީހުންގެ ލިސްޓު އާންމުކޮށް، ފެންނާނޭހެން ޝާއިޢުކުރެވިފައިވާ ކަމަށެވެ. މިގޮތަށް އާންމުކޮށް އިޢުލާނުކޮށް، ހާމަކަން ބޮޑު ގޮތެއްގައި ޕާކިންގ ސްލޮޓްތައް ދޫކުރުމުގެ މަސައްކަތްކުރަމުން ދަނިކޮށް، އެކަމާ ގުޅޭގޮތުން އާންމުންނަށް އޮޅުން އަރާ ގޮތަށް ޙަޤީޤަތާ ޚިލާފު މަޢުލޫމާތު ފަތުރަމުން ގެންދިއުމަކީ ކަންބޮޑުވާ ކަމެއްކަމަށް އެޗްޑީސީން ބުންޏެވެ.
ވަކި ބަޔަކަށް ނާޖާއިޒު މަންފާ ލިބޭ ގޮތަށް ޕާކިން ސްލޮޓްތައް ވިއްކަމުންދާކަމަށް ބުނެ އެ ކޯޕަރޭޝަނުގެ އިތުބާރު ގެއްލޭގޮތަށް މަޢުލޫމާތު ޝާއިޢުކޮށްފައިވާތީ އެކަން ކުށްވެރިކުރާ ކަމަށާއި، އެފަދަ ޙަޤީޤަތާ ޚިލާފު މަޢުލޫމާތު އާންމުކުރާ ފަރާތްތަކުގެ މައްސަލަ ކަމާ ބެހޭ އިދާރާތަކަށް ހުށަހަޅާނެކަމަށް އެޗްޑީސީން ވަނީ އިތުރަށް ބުނެފައެވެ.
ރައްޔިތުންނާ ގުޅޭ ޚިދުމަތްތަކާ ގުޅޭގޮތުން ޙަޤީޤަތާ ޚިލާފު މަޢުލޫމާތު ނުފެތުރުމަށް އެޗްޑީސީން ވަނީ އިލްތިމާސްކޮށްފައެވެ.
