އުކުޅުވަޅު ހުޅުގެ ހަލާކުވަމުންދާ ކަށި ނުވަތަ (Osteonecrosis)އަށް ފަރުވާ ދިނުމަށްޓަކައި، ’ކޯ ޑިކޮމްޕްރެޝަން‘ ސާޖަރީގެ އެންމެ ފަހުގެ ޓެކްނޮލޮޖީ ދަރުމަވަންތަ ހޮސްޕިޓަލާއި އައި.ޖީ.އެމް.އެޗްގައި ތައާރަފުކޮށްފިއެވެ.
މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް ހަލީމް އަބްދުއްރައްޒާޤު ސޯޝަލްމީޑިއާގައި ކުރެއްވި ޕޯސްޓެއްގައި ވަނީ މިކަމުގެ ތަފްސީލް ހިއްސާ ކުރައްވާފައެވެ.
އެގޮތުން މި ފަރުވާގައި ހާއްސަ އާލާތްތަކެއް ބޭނުންކޮށްގެން ހަލާކުވަމުންދާ ކަށި ސާފުކުރުމަށްފަހު، ”ބޯން ގްރާފްޓް“ އަދި ”ޕީ.އާރު.ޕީ(PRP) “ މެދުވެރިކޮށް އާ ކަށި އުފެއްދުމަށް މަގުފަހިކޮށްދޭނެކަމަށް އޭނާ ވިދާޅުވިއެވެ. އަދި މިއީ ’މިނިމަލީ އިންވޭސިވް‘ ނުވަތަ ހަށިގަނޑުން ވަރަށް ކުޑަ ތަންކޮޅެއް ކަފައިގެން ކުރިއަށްގެންދާ ސާޖަރީއަކަށް ވުމުން، ބަލިމީހާ އުފުލަންޖެހޭ ތަކުލީފުތައް ކުޑަވެ، ފަރުވާއަށްފަހު އަވަހަށް ފަސޭހަވުމުގެ ފުރުސަތު ބޮޑުވެގެންދާކަމަށްވެސް ވިދާޅުވިއެވެ.
އުކުޅުވަޅު ހުޅުގެ ހަލާކުވަމުންދާ ކަށި ނުވަތަ (Osteonecrosis)އަށް ފަރުވާ ދިނުމަށްޓަކައި، 'ކޯ ޑިކޮމްޕްރެޝަން' ސާޖަރީގެ އެންމެ ފަހުގެ ޓެކްނޮލޮޖީ ދަރުމަވަންތަ ހޮސްޕިޓަލާއި އައި.ޖީ.އެމް.އެޗްގައި މިވަނީ ތައާރަފުކޮށްފައި.
މި ފަރުވާގައި ހާއްސަ އާލާތްތަކެއް ބޭނުންކޮށްގެން ހަލާކުވަމުންދާ… pic.twitter.com/lI4OeTrCxV— Haleem (@22halex) April 2, 2026
ހަލީމް ވަނީ ސިއްހީދާއިރާ އަށް ރައީސް މުޢިއްޒު ގެނެސްދެއްވާ އިންޤިލާބީ ބަދަލު ފާހަގަކުރައްވާ ޝުކުރު ދަންނަވާފައެވެ.
”ރާއްޖޭގެ ސިއްހީ ދާއިރާ ހަރުދަނާކޮށް، މިފަދަ ޒަމާނީ ފަރުވާތައް ދިވެހި ރައްޔިތުންނަށް ފަހިކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވާ ޚާއްސަ އަހަންމިއްޔަތުކަމާއި އެހީތެރިކަމަށް، އެމަނިކުފާނަށް ނުހަނު އިޚްލާޞްތެރިކަމާއެކު ޝުކުރު ދަންނަވަން“ ހަލީމް ވިދާޅުވިއެވެ.
ހަލީމް ވަނީ މި ޚިދުމަތް ތަޢާރަފުކުރުމުގައި ދަރުމަވަންތަ ހޮސްޕިޓަލް އަދި އައި.ޖީ.އެމް.އެޗްގެ ކަށީގެ ބަލިތަކާބެހޭ ޑިޕާޓްމަންޓުގެ ހީވާގި ޑޮކްޓަރުންނާއި، ނަރުހުން އަދި ޓެކްނިކަލް މުވައްޒަފުންގެ އިތުރުން މިކަމުގައި ބައިވެރިވި ހުރިހާ މުވައްޒަފުން ކުރެއްވި މަސައްކަތް ފާހަގަކޮށް، އެ ފަރާތްތަކަށް ޝުކުރު އަދާކުރައްވާފައެވެ. އިތުރަށް ހަލީމް ވިދާޅުވީ މާލެ ސިޓީ ގުރޫޕް އޮފް ހޮސްޕިޓަލްސްގެ އަމާޒަކީ ރައްޔިތުންނަށް ފެންވަރު ރަނގަޅު ސިއްހީ ޚިދުމަތްތައް މެދުނުކެނޑި ފޯރުކޮށްދިނުން ކަމަށެވެ.
ދާދިފަހުން ހާޓް އެޓޭކް ޖެހޭ މީހުންނަށް ދެވޭ އަވަސް ފަރުވާގެ ޚިދުމަތް މާލޭގެ ބޭރުން، ފުރަތަމަ ފަހަރަށް އައްޑޫ ސިޓީގައި ވަނީ ކާމިިޔާބު ކަމާއެކު ފަށާފައެވެ. އަދި މީގެ އިތުރުން، ހިތުގެ މައްސަލަތަކަށް ބޭނުންވާ ”އައި.ސީ.ޑީ“ އަދި ”ޕާމަނަންޓް ޕޭސްމޭކަރ“ ހަރުކުރުމުގެ ޚިދުމަތްވެސް ވަނީ ތަޢާރަފުކޮށްފައެވެ.
