ކުޅުދުއްފުށި ސިޓީގައި ތަރައްޤީކުރާ 2،000 ހައުސިންގ ޔުނިޓްގެ ޢަމަލީ މަސައްކަތް ފަށައިފިއެވެ.
މި ހައުސިންގ ޔުނިޓްތަކުގެ ޢަމަލީ މަސައްކަތް ފަށާފައިވަނީ އެކަމަށްޓަކައި އެ ސިޓީގައި ބޭއްވި ޚާއްޞަ ރަސްމިއްޔާތުގައެވެ.
ކުޅުދުއްފުށި ސިޓީގައި ތަރައްޤީކުރާ 2،000 ހައުސިންގ ޔުނިޓްގެ ޢަމަލީ މަސައްކަތް ފައްޓަވައިދެއްވީ، މި ހައުސިންގ ޔުނިޓުތަކުގެ ބިންގާއަޅުއްވައިދެއްވީ، ކޮންސްޓްރަކްޝަން މިނިސްޓަރު ޑރ. ޢަބްދުﷲ މުއްޠަލިބާއި، ފިޝަރީޒް މިނިސްޓަރު އަޙްމަދު ޝިޔާމާއި، އެޗްޑީސީގެ މެނޭޖިންގ ޑިރެކްޓަރު ބްރިގޭޑިޔާރ ޖެނެރަލް (ރިޓަޔަރޑް) ޢަލީ ޒުހައިރުގެ އިތުރުން ކުޅުދުއްފުށި އުތުރު ދާއިރާގެ މެންބަރު މުޙައްމަދު ދާވޫދާއި، ކުޅުދުއްފުށި ދެކުނު ދާއިރާގެ މެންބަރު ފަރުހަތު މުޙައްމަދެވެ.
މިއީ ކުޅުދުއްފުށްޓަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދައިދިނުމުގެ ގޮތުން ސަރުކާރުގެ ”ބޯހިޔާވަހިކަން އެންމެންނަށް“ ސިޔާސަތުގެ ދަށުން އެޗްޑީސީއާއި ޙަވާލުކޮށްގެން ކުރިއަށްގެންދާ މަޝްރޫޢެކެވެ. މި މަޝްރޫޢުގެ ދަށުން ތަރައްޤީކުރެވޭ ހައުސިންގ ޔުނިޓްތަކުގެ ތަފްޞީލް:
- މި މަޝްރޫޢުގެ ދަށުން ޖުމުލަ 14 ފަންގިފިލާގެ 13 ޓަވަރު ތަރައްޤީކުރުމަށް ވަނީ ހަމަޖެހިފައި
- ޓަވަރުތަކުގެ ކޮންމެ ފަންގިފިލާއެއްގައި 12 ޔުނިޓް ހުންނާނެ
- ޔުނިޓްތަކުގެ ބޮޑުމިނުގައި 900 އަކަފޫޓު ހުންނާނެ
- ކޮންމެ ޔުނިޓެއްގައި ތިން ކޮޓަރި ހިމެނޭނެ
ކުޅުދުއްފުށި ސިޓީއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯއްދަވައިދެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދެއްކަން ފާހަގަކޮށްލެވެއެވެ.
