ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ކޮންގްރެސް ޕާޓީގެ ފަރާތުން މާލޭ ސިޓީގެ މޭޔަރަކަމަށް ވާދަކުރައްވާ ކެންޑިޑޭޓް މޫސާ ޢަލީ ޖަލީލަކީ ޤައުމީ ވިސްނުމުގައި މަސައްކަތް ކޮށްދެއްވާނެ ބޭފުޅެއް ކަމަށާއި, އެހެންކަމުން ސިޔާސީ ޕާޓީގެ ރޫޙު ދޫކޮށްލައި ހުރިހާ ފަރާތްތަކުން ވެސް އެ ބޭފުޅާއަށް ވޯޓު ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެދިވަޑައިގެންފިއެވެ.
ރައީސް މުޢިއްޒު މި މޭރުމުން ވިދާޅުވީ، ކޮންގްރެސް ޕާޓީން އަރޓިފިޝަލް ބީޗު ސަރަޙައްދުގައި ރޭ ކުރިއަށްގެންދިޔަ ހަރުގެ ޖަލްސާގައި ވާހަކަދައްކަވަމުންނެވެ. އެމަނިކުފާނު ވިދާޅުވީ، މި ސަރުކާރަށް މުހިންމީ އަމިއްލަ އެދުންތައް އިސްކުރާ ކެންޑިޑޭޓަކަށްވުރެ ބޮޑަށް ޤައުމު އިސްކުރާ ކެންޑިޑޭޓެއް ކަމަށެވެ. އެހެންކަމުން ކޮންގްރެސް ޕާޓީގެ ޓިކެޓުގައި މާލޭ ސިޓީގެ މޭޔަރަކަށް އިންތިޚާބު ކުރަން ބޭނުންފުޅުވީ ޤައުމީ ވިސްނުން އިސްކުރައްވާނެ ފަދަ ބޭފުޅެއްކަމަށް ރައީސް ވަނީ ވިދާޅުވެފައެވެ.
ޖަލީލަކީ މާލޭ ސިޓީގެ ރައްޔިތުންނާއި އެ ސިޓީގައި ދިރިއުޅޭ ރައްޔިތުން އެދޭ ގޮތަށް ކަންކަން ކޮށްދެއްވުމުގައި އިޙްލާޞްތެރިކަމާއެކު މަސައްކަތް ކޮށްދެއްވާނެ ފަދަ ބޭފުޅެއްކަމާއިމެދު އެއްވެސް ޝައްކެއް ނުކުރައްވާކަން ފާހަގަކުރައްވަމުން ރައީސް ވިދާޅުވީ، އެމަނިކުފާނު މާލޭ ސިޓީގެ މޭޔަރަކަށް ހުންނެވި ދުވަސްވަރު، އެ ސިޓީގެ ރައްޔިތުންނަށް ވެވަޑައިގެންފައިވާ ވަޢުދުތައް ތަންފީޒުކުރުމަށް، މާލޭ ސިޓީ ކައުންސިލުގެ އެއްބާރުލުން ސަރުކާރަށް ބޭނުންވާ ކަމަށެވެ.
”މާލޭގެ ލޮބުވެތި ރައްޔިތުންގެ ކިބައިން އަޅުގަނޑު އެދެނީ އަޅުގަނޑުމެންގެ ޤައުމީ ބަޠަލު މޫސާ ޢަލީ ޖަލީލަށް ތާއީދުކުރައްވައި 4 އޭޕްރީލް ވަނަ ދުވަހު އޮންނަ ވޯޓުގައި އެމަނިކުފާނު ހޮއްވަވައި ދެއްވުމަށް،“ – ރައީސް މުޢިއްޒު ވިދާޅުވިއެވެ.
ރައީސް މުޢިއްޒު އިތުރަށް ވިދާޅުވީ، މިއަދު ދިވެހިން މިނިވަންކަންމަތީގައި ތިބީ 3 ނޮވެމްބަރުގެ ޢުދުވާނީ ޙަމަލާއިން ޤައުމު ސަލާމަތް ކޮށްދިނުމަށް އާންމުންނާއި ސިފައިން އެ ދުވަހު ކުރި ބުރަ މަސައްކަތުން ކަމަށެވެ. ވަކިން ޚާއްޞަކޮށް އެ ދުވަހުގެ ބަޠަލު މޫސާ ޢަލީ ޖަލީލް، މޭ އައްޑަނައަށް ދިއްކޮށްލައްވައިގެން ދުޝްމަނުންނާއި ދެކޮޅަށް ކުރެއްވި މަސައްކަތް މިއަދުގެ ޒުވާން ޖީލަށް ނޭނގިދާނެ ކަމަށް ރައީސް ވިދާޅުވިއެވެ.
