މި މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި ގުޅިގެން، މާލޭ ސިޓީގެ މަގުތަކުގައި ބައެއް ކެޓަގަރީތަކުގެ އުޅަނދުތައް ދުއްވުން މަނާ ވަގުތުތައް ޓްރާންސްޕޯރޓް މިނިސްޓްރީން ހާމަކޮށްފިއެވެ.
މިކަން ހާމަކޮށް އެ މިނިސްޓްރީން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، މި ބަދަލުތައް ގެނައުމަށް ނިންމާފައިވަނީ އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ އިންތިޚާބުތަކާއި ގުޅިގެން، މަގުމަތީގެ ރައްކާތެރިކަން ދެމެހެއްޓުމަށާއި، މަގުމަތީގެ ތޮއްޖެހުން ކުޑަކުރުމުގެ ގޮތުން ކަމަށެވެ.
04 އޭޕްރިލް 2026 ވަނަ ދުވަހު ގްރޭޓަރ މާލެ ސަރަހައްދުގައި އިންޖީނުލީ އެއްގަމު އުޅަނދު ދުއްވުން މަނާ ވަގުތު ކަނޑައެޅުމާ ގުޅޭhttps://t.co/FKKFIEcUHa pic.twitter.com/8wMIjsoiTP
— Ministry of Transport and Civil Aviation (@MoTCAmv) March 31, 2026
ޓްރާންސްޕޯރޓް މިނިސްޓްރީން ބުނީ، އެ ދުވަހު ދުއްވުން މަނާކޮށްފައިވާނީ ބަރު އުޅަނދުތަކުގެ ތެރެއިން C0, C2, D, E އަދި V ކެޓަގަރީގެ އެއްގަމު އުޅަނދު ކަމަށެވެ. އެގޮތުން އޭޕްރީލް 4 ވާ ހޮނިހިރު ދުވަހުގެ ހެނދުނު 06:00 އިން ފެށިގެން ރޭގަނޑު 23:00 ގެ ނިޔަލަށް މިފަދަ އުޅަނދުތައް ދުއްވުމަކީ މަނާކަމެއް ކަމުގައި އެ މިނިސްޓްރީން ވަނީ ބުނެފައެވެ.
ނަމަވެސް، ސަލާމަތީ ބާރުތަކުން ބޭނުންކުރާ އިންޖީނުލީ އުޅަނދުތައް މި ނިންމުމުން އިސްތިސްނާވާނެއެވެ.
ކަނޑައެޅިފައިވާ ވަގުތުތަކުގައި، މި ކެޓަގަރީތަކުގެ އުޅަނދުތައް މާލޭ ސިޓީގައި ދުއްވުމަކީ އެއްގަމު ދަތުރުފަތުރުގެ ޤާނޫނުގެ ފަސްވަނަ މާއްދާގެ (ރ) ގެ ދަށުން މަނާކަމަކަށްވުމުން، މި އެންގުމާ ޚިލާފުވާ އެންމެހައި ފަރާތްތަކާމެދު، އެއްގަމު ދަތުރުފަތުރުގެ ޤާނޫނުގެ 67 އަދި 68 ވަނަ މާއްދާގެ ދަށުން ޤާނޫނީ ފިޔަވަޅު އެޅޭނެކަމަށް ޓްރާންސްޕޯރޓް މިނިސްޓްރީން ވަނީ އިތުރަށް ބުނެފައެވެ.
