ދިވެހިރާއްޖެއަށް އާންމުކޮށް އެތެރެކުރާ އަސާސީ ބައެއް ކާބޯތަކެއްޗާއި ހިލައާއި ހިލަވެލި ފަދަ ތަކެތި އެއްވެސް ދަތިކަމެއްނެތި ލިބެމުންދާނެ ކަމަށް އެތަކެތި އާންމުކޮށް އެތެރެކުރާ ޤައުމު ކަމަށްވާ އަވައްޓެރި އިންޑިއާއިން ބުނެފިއެވެ.
އިންޑިއާ ސަރުކާރުންވަނީ އާންމުކޮށް އެ ތަކެތި އެތެރެކުރާ މިންވަރަށް ވުރެ އިތުރަށް މިއަހަރު ރާއްޖެއަށް އެކްސްޕޯޓް ކުރުމަށް ނިންމާފައެވެ.
ރާއްޖޭގައި ހުންނަ އިންޑިއާގެ ހައިކޮމިޝަނުން ނެރުނު ބަޔާނެއްގައި ބުނީ، ދިވެހި ސަރުކާރުގެ އެދިވަޑައިގަތުމުގެ މަތިން އަސާސީ ބައެއް ކާބޯތަކެއްޗާއި އިމާރާތް ކުރުމަަށް ބޭނުންވާ ތަކެތި އާއްމުކޮށް ރާއްޖެއަށް އެކްސްޕޯޓް ކުރާ މިންވަރަށް ވުރެ އިތުރަށް އެކްސްޕޯޓް ކުރުމަށް އިންޑިއާ ސަރުކާރުން ނިންމަވާފައިވާ ކަމަށެވެ. އޭގެތެރޭގައި ހިމެނެނީ ބިސް, އަލުވި، ފިޔާ، ހަނޑޫ، ފުށް، ހަކުރު އަދި މުގުގެ އިތުރުން، ހިލައާއި ހިލަވެލިކަމަށާއި، އަދި ރާއްޖެއިން އެދިފައިވާ މިންވަރަށް މިހުރިހާ ބާވަތެއްވެސް އިންޑިއާއިން ފޯރުކޮށްދިނުމަށް ނިންމާފައިވާ ކަމަށްވެސް ހައިކޮމިޝަން ބަޔާނުގައި ވަނީ ބުނެފައެވެ.
https://twitter.com/HCIMaldives/status/2039319576492855369/photo/1
އިންޑިއާއިން އަސާސީ ކާބޯތަކެއްޗާއި އެހެނިހެން މުދާ، އެހެން ޤައުމުތަކަަށް އެކްސްޕޯޓް ކުރުން ހުއްޓާލާ ހާލަތެއްގައިވެސް، ރާއްޖެއަށް ބޭނުންވާ އަސާސީ މުދާ ފޯރުކޮށްދޭނެ ކަމުގެ ޔަޤީންކަން އެ ޤައުމުން ވަނީ ދީފައެވެ. އަދި ނެއިބަރހުޑް ފަސްޓް ޕޮލިސީގެ ދަށުން ރާއްޖޭގެ ތަރައްޤީއަށް އިންޑިއާއިން ކުރާ މަސައްކަތުގައި ދެމިއޮންނާނެ ކަމަށްވެސް އިންޑިޔާ ހައިކޮމިޝަނުން ނެރުއްވި ބަޔާނުގައިވެއެވެ.
މީގެ އިތުރުން އިންޑިއާާއިން ރާއްޖެއަށް ޚާއްސަ ކޯޓާއެއްގެ ދަށުން އަސާސީ މުދާ އެކްސްޕޯޓް ކުރުމަށް 1981 ވަނަ އަހަރު އެއްބަސްވުމެއް ޤާއިމުކޮށްފައިވާއިރު، އެ އެއްބަސްވުމުގެ ދަށުން އެންމެ ގިނަ އަދަދަކަށް ރާއްޖެއަށް މުދާ އެކްސްޕޯޓް ކުރާ ފަހަރަކީ މިއީ ކަމަށްވެސް އިންޑިއާއިން ވަނީ ފާހަގަކޮށްފައެވެ.
