ސަރުކާރުގެ ބޯހިޔާވަހިކަން އެންމެންނަށް ސިޔާސަތުގެ ދަށުން އަލަށް ތަޢާރަފުކުރި ”ބިންވެރިޔާ“ ޚާއްޞަ ސްކީމަށް އެދި ފޯމު ހުށަހެޅުމުގެ ފުރުޞަތު ކޮންސްޓްރަކްޝަން މިނިސްޓްރީން ހުޅުވާލައިފިއެވެ.
މިކަމާ ގުޅިގެން ކޮންސްޓްރަކްޝަން މިނިސްޓްރީން ނެރެފައިވާ އިޢުލާނެއްގައި ބުނެފައިވަނީ، ”ބިންވެރިޔާ“ ޚާއްޞަ ސްކީމާ ގުޅޭ އުޞޫލުގެ ދަށުން 1،250 އަކަފޫޓުގެ ގޯތި ރަސްމާލެއިން ދޫކުރުމަށް ހަމަޖެހިފައިވާ ކަމަށެވެ. މި އުޞޫލުގައި މައިގަނޑު ދެ ކެޓަގަރީއެއް ހިމެނެއެވެ. އެ ކެޓަގަރީތަކަކީ:
- ކެޓަގަރީ 1: ބިންވެރިޔާ ސްކީމުގެ ދަށުން ޖޮއިޓް އެޕްލިކޭޝަން ހުށަހަޅައި ގޯތި ލިބިފައިވާ ފަރާތްތައް
- ކެޓަގަރީ 2: ސަރުކާރުން ހިންގާފައިވާ އަސާސީ ބޯހިޔާވަހިކަމުގެ ސްކީމަކުން ފުލެޓެއް ލިބިފައި އޮވެގެން ބިންވެރިޔާ ސްކީމަށް ކުރިމަތި ނުލެވުނު ފަރާތްތައް
ކޮންސްޓްރަކްޝަން މިނިސްޓްރީން ބުނީ، މި އުޞޫލުގެ ދަށުން ބޯހިޔާވަހިކަމަށް އެދި ފޯމު ހުށަހެޅުމުގެ ފުރުޞަތު މިއަދު ހެނދުނު 11:00 އިން ފެށިގެން މި މަހުގެ 30 ވާ ބުރާސްފަތި ދުވަހުގެ ރޭ 23:59 ގެ ނިޔަލަށް ހުޅުވާލެވިފައިވާ ކަމަށެވެ. މި އުޞޫލުގެ ދަށުން ބޯހިޔާވަހިކަމަށް އެދި ފޯމު ހުށަހަޅަންޖެހޭނީ https://boahiyaavahikan.housing.gov.mv ޕޯޓަލް މެދުވެރިކޮށެވެ.
މިކަމާ ގުޅޭގޮތުން އިތުރަށް މަޢުލޫމާތު ސާފުކުރަން ބޭނުންވާ ފަރާތްތަކުން، ކޮންސްޓްރަކްޝަން މިނިސްޓްރީގެ ހޮޓްލައިން ނަންބަރު 4004860, 4004861, 4004862, 4004863, 4004864 ނުވަތަ 4004865 ނަންބަރަށް ގުޅައިގެން ނުވަތަ އެ މިނިސްޓްރީގެ އީމެއިލް
hotline@infrastructure.gov.mv އަށް ހުށަހަޅައިގެން ވެސް މަޢުލޫމާތު ސާފުކުރެވޭނެއެވެ.
