ތެހެރާން — އީރާނުގެ އިސްވެރިން ޤަތުލުކޮށްލުމާއި އެ ގައުމުގެ ޢުމްރާނީ ވަޞީލަތްތަކަށް ޙަމަލާދިނުމާއި ގުޅިގެން، ތެހެރާނުން މިހާރު ވަނީ ރަސްމީކޮށް ”މިރަރ ވޯފެއަރ“ ނުވަތަ ހަނގުރާމައިގައި އެއްވަރަކަށް ބަދަލުހިފުމުގެ އުކުޅުގެ ބޭނުން ހިފަން ފަށައިފައެވެ. އަދި އީރާނުގެ ތެލަށް އެމެރިކާއިން ދޭ ކޮންމެ ޙަމަލާއެއްގެ ބަދަލުގައި، ހުޅަނގާ ގުޅުންހުރި ތެޔޮ ޓޭންކަރަކަށް އީރާނުގެ ޙަމަލާ އެބަ އަމާޒު ކުރެއެވެ. އީރާނަށް ދޭ ކޮންމެ ޙަމަލާއެއްގެ ބަދަލު އީރާނުން އެމެރިކާޔާ އޭގެ ބައިވެރިންގެ ފުށުން ހިފައެވެ. މިކަމުން ހާމަވަނީ ޒަމާނުއްސުރެ އެމެރިކާޔާ ހުޅަނގުން އެމީހުންގެ މަސްލަޙަތުތަކާ ޚިލާފުވާ ކޮންމެ ޤައުމަކަށް ދަތިކުރުމުގެ ފިޔަވަޅުތައް އަޅާ، ސިޔާސީ ގޮތުންނާއި އަސްކަރީގޮތުން ބިރުދައްކައިގެން ޤައުމުތައް އަޅުވެތިކުރުން ނިމުމަކަަށް އަންނަކަމެވެ.
މި ރޭވުންތެރި ”ބަދަލުހިފުމުގެ“ އުސޫލަކީ، ބޮން އެޅުމުގެ ސަބަބުން އީރާނު ނުގުޑާނެކަން ހުޅަނގަށް ދެއްކުމަށް ކަނޑައަޅާފައިވާ އުސޫލެކެވެ. އިޒްރޭލާއި އެމެރިކާއިން އިތުރުކުރާ ކޮންމެ ހަމަލާއަކަށް އެއާ އެއްވަރުގެ ރައްދެއް ދިނުމުގެ ސަބަބުން، އެމެރިކާގެ އަސްކަރީ ބާރު ކަނޑުވާލުމުގައި ތެހެރާނަށް ވަނީ ކާމިޔާބު ލިބެން ފަށައިފައެވެ. އީރާނުންދޭ މެސެޖަކީ ސާފު މެސެޖެކެވެ. އީރާނުގެ އިޤްތިޞާދަށް ގެއްލުންދޭނަމަ، ދުނިޔޭގެ އިޤްތިޞާދަށްވެސް އެކަމުގެ ހިތި އަސަރުކުރާނެއެވެ. އެއްބަޔަކު އަނެއްބަޔަކަށް ރައްދު ދިނުމުގެ މި ބައިބަލާގެ ސަބަބުން، ބެލެވޭ ގޮތުގައި މި ހަނގުރާމަ ވެގެންދާނީ، ކެތްތެރިކަން އެންމެ ބޮޑު ބަޔަކު މޮޅުވެގެންދާނެ ހަނގުރާމައަކަށެވެ.
