ގަލްފުގެ ޤައުމުތަކަށް އީރާނުން ދެމުންގެންދާ ހަމަލާތަކުގެ ތެރެއިން، ޔޫއޭއީ އަށް ޑްރޯންތައް ބޭނުންކޮށްގެން ދިން ހަމަލާއެއް އިންޓަސެޕްޓު ކުރަން އުޅުމުގެ ތެރޭގައި ބުރައިގެންދިޔަ ބައިތައް ފުރައިޖާ ސިޓީގެ އަލް-ރިފާ ސަރަހައްދުގެ ފާމްއަކަށް ވެއްޓި ބަންލަދޭޝްގެ ރައްޔިތަކު މަރުވެއްޖެއެވެ.
މީގެ އިތުރުން ކުވެއިތުގެ އިންޓަނޭޝަނަލް އެއާޕޯޓަށް އަމާޒުކޮށް އީރާނުން މިއަދު ފޮނުވާލި ޑްރޯންތަކެއް ވަނީ އެއެއާޕޯޓުގައި ހުރި ތެޔޯ ޓޭންކުތަކަކަށް އަމާޒުވެ، ވަރަށް ބޮޑަށް އަލިފާންހިފާފައެވެ. ކުވެއިތުގެ ސިވިލް އޭވިއޭޝަނުގެ ތަރުޖަމާނު ބުނެފައިވާ ގޮތުގައި މި އެއާޕޯޓަށް ވަނީ “އިރާނާއި އެމީހުން ސަޕޯޓުކުރާ ހަތިޔާރުއެޅި ޖަމާއަތްތައް” ގިނަ ހަމަލާތަކެއް އަމާޒުކޮށްފައެވެ.
މިޤައުމުތަކުގެ އިތުރުން ބަހްރޭނާއި، ޤަތަރުގެ ވެރިރަށް ދޯހާއަށް އަމާޒުކޮށްވެސް އީރާނުން ހަމަލާތައް ދީފައިވެއެވެ.
