މާލޭ ސިޓީއަށް ނިސްބަތްވާ އެތަށް ވިޔަފާރިންގެ ތާއީދު ވެރިކަންކުރާ ޕާޓީ ޕީއެންސީގެ ފަރާތުން މާލޭ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓް މޫސާ ޢަލީ ޖަލީލަށް ދީފިއެވެ.
ވިޔަފާރިވެރިންގެ ތާއީދު މޫސާ ޢަލީ ޖަލީލަށް އޮތްކަން އެ ފަރާތްތަކުން ހާމަކޮށްފައިވަނީ، މާލޭ ސަރަޙައްދުގައި ހިންގާ ގިނަ އަދަދެއްގެ ކުދި އަދި މެދު ފަންތީގެ ވިޔަފާރިތަކަށް ދިމާވެފައިވާ ގުދަންކުރުމާއި އުޅަނދުފަހަރު ޕާކުކުރުމުގެ މައްސަލަތަކަށް ސަރުކާރާއި ގުޅިގެން ޙައްލު ހޯދުމުގެ މަޤްޞަދުގައި، މާލޭގެ މަންހައްޓަން ރެސްޓޯރަންޓުގައި މިއަދު ބޭއްވި ބައްދަލުވުމުގެ ތެރެއިންނެވެ.
މާލޭ ސިޓީގެ ތަރައްޤީއަށް ކުރިމަތިވެފައިވާ ހުރަސްތައް ނައްތާލެވޭނީ ސަރުކާރުގެ ސިޔާސަތުތަކަށް ފުރިހަމައަށް އެއްބާރުލުންދޭ، ސަރުކާރާއި ގުޅިގެން މަސައްކަތްކުރާ އިދާރާއަކަށް މާލޭ ސިޓީ ކައުންސިލް ހަދައިގެންކަން ފާހަގަކުރަމުން ބައްދަލުވުމުގައި ބައިވެރިވި ވިޔަފާރިވެރިން ބުނެފައިވަނީ، މާލޭ ސިޓީއަށް ދިމާވެފައިވާ މިފަދަ މައްސަލަތަކަށް ޙައްލު ހޯއްދަވައިދެއްވާނެ ކެންޑިޑޭޓަކީ މޫސާ ޢަލީ ޖަލީލް ކަމަށެވެ.
މި ބައްދަލުވުމުގައި ވިޔަފާރިވެރިން ވަނީ އެ ފަރާތްތަކަށް ދިމާވާ ގޮންޖެހުންތަކާއި ދަތިތައް މޫސާ ޢަލީ ޖަލީލާއި ޙިއްޞާކުރައްވައިފައެވެ. ވިޔަފާރިވެރިންގެ ކަންބޮޑުވުންތައް އަޑުއެއްސެވުމަށް ފަހު، ޖަލީލު ވިދާޅުވީ، މުދާ ރައްކާކުރުމާއި އުޅަނދުފަހަރު ޕާކުކުރުމަށް ދިމާވާ ދަތިތައް ނައްތާލުމަށް ސަރުކާރުން މުހިންމު މަސައްކަތްތަކެއް ފަށާފައިވާކަމަށެވެ. މީގެ އިތުރުން، އަލަށް ވިޔަފާރިއެއް ފަށަން ބޭނުންވާ ޒުވާނުންނަށާއި، މިހާރު ހިނގަމުންދާ ކުދި ވިޔަފާރިތަކަށް ފަހި މާޙައުލެއް ޤާއިމުކޮށްދިނުމުގެ ފުރިހަމަ ތަޞައްވުރެއް ގެންގުޅުއްވާކަމަށް ޖަލީލު ވަނީ ވިދާޅުވެފައެވެ.
މޫސާ ޢަލީ ޖަލީލް ވަނީ މާލޭ ސިޓީގެ މޭޔަރުކަމަށް އިންތިޚާބުވެވަޑައިގެންފިނަމަ، މާލޭ ސިޓީގެ ރައްޔިތުންނާއި ގުޅުންހުރި ބޮޑެތި ކަންކަން ނިންމުމުގައި ހުރިހާ ރައްޔިތުންގެ ވެސް ޚިޔާލާއި މަޝްވަރާ ހޯއްދަވާނެކަމުގެ ޔަޤީންކަން ދެއްވައިފައެވެ.
