ބައިރޫތު – އީރާނާއެކު ހިނގަމުންދާ ހޫނު ހަނގުރާމަ ނިވާފަތްގަނޑަކަށް ހަދައި، އިޒްރޭލުގެ ފައުޖުތަކުން ލުބުނާނަށް ދެމުން ގެންދާ ހަމަލާތައް ވަނީ ވަރަށް ބޮޑަށް އިތުރުކޮށްފައެވެ. ބުދަ ދުވަހު ބައިރޫތުގެ ދެކުނުން އޮންނަ ޖުނާހް ސަރަޙައްދަށާއި އައްސޭރިފަށުގެ ރަށެއް ކަމަށްވާ ޚަލްދޭއަށް އަމާޒުކޮށް ދިން ހަމަލާތަކުގައި މަދުވެގެން 7 އާންމުން ޤަތުލުކޮށްލައި، އެތައް ބަޔަކު ވަނީ ޒަޚަމްކޮށްލާފައެވެ.
އިޒްރޭލުގެ ދިފާޢީ ބާރު (އައި.ޑީ.އެފް) އިން މިއީ ހިޒްބުاللهގެ ކޮމާންޑަރުންނާ ދެކޮޅަށް ހިންގާ ”ޓެރަރިޒަމާ ދެކޮޅު“ އޮޕަރޭޝަން ތަކެއްގެ ގޮތުގައި ސިފަކުރި ނަމަވެސް، ސަރަޙައްދީ މުޙައްލިލުން ފާހަގަކުރަނީ މިއީ ބިން ފޭރުމުގެ ނިޔަތުގައި ހިންގާ ޢަމަލުތަކެއްގެ ގޮތުގައެވެ. ޖުނާހް ފަދަ ޢާންމުން ދިރިއުޅޭ ސަރަޙައްދު ތަކުގައި ހުރި އާންމުންގެ އުޅަނދުތަކަށް އަމާޒުކޮށް ދިން މި ޙަމަލާތަކަކީ، ލުބުނާނުގެ ދައުލަތް ބަލިކަށިކޮށްލުމަށް ރޭވިގެން ހިންގާ ޖަރީމާއެއް ކަމަށް ބެލެވެއެވެ.
މެދުއިރުމަތީގެ މަސްރަޙު ދިރާސާކުރާ ފަރާތްތަކުން ބުނާގޮތުގައި، އިޒްރޭލުން ”އީރާނު ހަނގުރާމަ“ ޢުޒުރަކަށް ހަދައިގެން މަސައްކަތް ކުރަނީ، ދެކުނު ލުބުނާނު ދާޢިމީކޮށް ހިފުމަށް އެޤައުމުން ރާވާފާއިވާ ދިގު މުއްދަތުގެ އަމާޒު ޙާޞިލު ކުރުމަށެވެ. ލުބުނާނުގެ ބޯޑަރުން އެތެރެއަށް އިޒްރޭލުގެ ސިފައިން ވަންނަމުންދާ ދިއުމަކީ އެ ޤައުމުގެ މިނިވަންކަމަށް އަރައިގަތުމުގެ އިތުރުން، ”ބަފަރ ޒޯން“ ތައް ހަދައިގެން ބިން ފޭރި އިޒްރޭލުގެ ބައެއްގެ ގޮތުގައި ލުބުނާނު ހެދުމަށް ކުރާ މަސައްކަތެއް ކަމަށް ބެލެވެއެވެ.
ބަފަރ ޒޯނަކީ، ހަނގުރާމަ ކުރާ ދެ ބާރެއްގެ ދެމެދުގައި އިތުރަށް ހަމަނުޖެހުން ކުޑަކުރުމަށްޓަކައި ޙަމަލާ ބަދަލުކުރުން މަނާކަމަށް ކަނޑައަޅާ ސަރަހައްދެކެވެ. މިފަދަ ސަރަޙައްދު ތަކުގެ މަޤްޞަދަކީ ޞުލްޙައަށް މަގުހުޅުވުން ކަމުގައި ވިޔަސް އިޒްރޭލުން ވަނީ މީގެ ކުރިން ފަލަސްޠީނުގެ ބިން ފޭރިގަތުމުގައި ވެސް މިފަދަ ޒޯން ތަކުގެ ނާޖާއިޒު ފައިދާ ނަގައިފައެވެ.
މުހިންމު މަޢުލޫމާތު ހިމަނާފާއިވާ ކޮމްޕެކްޓް ޚަބަރެއް. މިދަނޑިވަޅުގައި ދިވެހި ނޫސްވެރިން މިފަދަ ޚަބަރުތަކަށް ފޯކަސް ކުރުން މުހިންމު ކަމުގައި ދެކެން.
ކީޕް އަޕް ދަ ގުޑް ވޯކް ޙަމްޒާ.