ފްރީ އެންޑް ފެއަރ އިލެކްޝަނެއް ބޭއްވޭނީ މައި ދެ އިންތިޚާބު އެއްދުވަހެއްގައި ބާއްވައިގެން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ،ރައީސުލްޖުމްހޫރިއްޔާގެ އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ޖަވާބުދެއްވަމުންނެވެ. އެމަނިކުފާނު ވިދާޅުވީ، ފްރީ އެންޑް ފެއަރ އިލެކްޝަނެއް ބޭއްވިއްޖެ ކަމަށްވާނަމަ، ރައީސުލްޖުމްހޫރިއްޔާއަކަށް ހޮވިގެންދާނެ ފަރާތެއް އެއްވެސް ފަރާތަކަށް ނޭނގޭނެ ކަމަށެވެ. ނަމަވެސް ދެ އިންތިޚާބު ދެދުވަހެއްގައި ބޭއްވުމުގެ ސަބަބުން ރައްޔިތުންގެ މަޖިލިސް އިންތިޚާބާއި ހަމައަށް ދާއިރު ސަރުކާރު އޮންނަނީ ހޮވިފައި ކަމަށާއި، އެހެންކަމުން މަޖިލިސް އިންތިޚާބުގައި ވެރިކަން ކުރާ ޕާޓީގެ ކެންޑިޑޭޓް ހޮވުމުގެ ފުރުޞަތު ބޮޑުކަމަށް ރައީސް ވަނީ ވިދާޅުވެފައެވެ.
އެކަން އެހެން ހިނގުމުގެ ސަބަބުން ހަމަހަމަކަން ގެއްލި އިދިކޮޅު ޕާޓީތަކަށް އޮންނަ ފުރުޞަތުތައް ހަނިވެގެންދާކަން ފާހަގަކުރައްވަމުން ރައީސް ވިދާޅުވީ، މިނިވަންކަމާއި ހަމަހަމަކަމާއެކު ހުރިހާ ފަރާތްތަކަށްވެސް ފުރުޞަތުތައް ފަހިކޮށްދިނުމަކީ ޑިމޮކްރަސީއެއްގައި އޮތުން ވަރަށް މުހިންމު ކަމެއް ކަމަށެވެ.
”އެހެންވީމަ ފްރީ އެންޑް ފެއަރ އިލެކްޝަނަކަށް ގާތްކުރުމަށް ލިބޭ ފުރުޞަތަކީ، އެ ހޮވޭ ސަރުކާރެއް ނޭނޭ ޙާލުގައި ހަމަ އެ ދުވަހު މަޖިލީހަށްވެސް މެންބަރުން ހޮވުން. ދެން އޭގެން އަންނަ އަނެއް ފައިދާއަކީ، މިހާތަނަށް މިދިޔަ ތިން ދައުރުގައި ސުޕަ މެޖޯރިޓީއެއް ނުވަތަ ވަރަށް ބޮޑު މެޖޯރިޓީއެއް މަޖިލީހަށް މި ލިބެނީ ވެރިކަން ކުރާ ޕާޓީއަށް. އެއީ މި ދެންނެވިހެން ސަރުކާރު ކެންޑިޑޭޓު މި ގޮތަށް ވަކާލާތުކޮށް، ސަރުކާރު ނުވަތަ ވެރިކަން ކުރާ ޕާޓީގެ ނިވަލުގައި ކެމްޕޭނުކޮށްގެން މި ވޯޓު ހޯދަނީ. އެހެންވީމަ އެކަމެއްނެތި އިންތިޚާބު ބޭއްވުނީމަ، ވަރަށް އީވެންލީ ޑިސްޓްރިބިއުޓެޑް ގޮތަކަށް މަޖިލީހަށް މެންބަރުން ހޮވޭނީ ސުޕަރ މެޖޯރިޓީ ނުވަތަ ވަކި ޕާޓީއެއްގެ މެންބަރުން ގިނަވާ ގޮތަކަށް ނޫނޭ.“ – ރައީސް ވިދާޅުވިއެވެ.
ދެ އިންތިޚާބު އެއްދުވަހެއްގައި ބޭއްވުމުގެ ސަބަބުން ވަރަށް ގިނަ ފައިދާތަކެއް ކުރާނެ ކަމަށާއި އޭގެ ތެރޭގައި، ތިންބާރު ވަކިވެފައި އޮންނަ ނިޒާމެއްގެ ތެރެއިން ސަރުކާރު ހިންގުމަށް މަގުފަހިވެގެންދާނެ ކަމަށް ރައީސް ވަނީ ވިދާޅުވެފައެވެ. އެމަނިކުފާނު ވިދާޅުވީ، ރައްޔިތުންގެ މަޖިލިސް ވާންޖެހޭނީ ސަރުކާރު ޖަވާބުދާރީ ކުރާ ބާރަކަށް ނަމަވެސް އެ ތަނުގައި ވެރިކަން ކުރާ ޕާޓީގެ މެންބަރުން ގިނަވެއްޖެ ކަމުގައިވާނަމަ، އެ ފުރުޞަތު ވަރަށް ބޮޑުތަނުން ހަނިވެގެންދާ ކަމަށެވެ.
ރަނގަޅު އިޞްލާޙީ ބަދަލުތަކެއް ޤާނޫނަށް ގެނެސް އެ ކަންކަން ތަންފީޒުކުރުމަކީ އެމަނިކުފާނު އެންމެ ބޮޑަށް ބޭނުންފުޅުވާ ގޮތް ކަމަށް ރައީސް މުޢިއްޒު ވަނީ އިތުރަށް ވިދާޅުވެފައެވެ.
