މާލެ ސަރަހައްދުގައި 1،500 ޓަނުގެ ގޭސް ރައްކާކުރެވޭނެ އިތުރު ފެސިލިޓީއެއް ގާއިމުކުރުމަށް ރާވާފައިވާކަން މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު އިޢުލާނު ކުރައްވައިފިއެވެ.
މާލީ ވަޒީރު މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.
ވަޒީރު ވިދާޅުވީ، ރާއްޖެއަށް މިވަގުތު ގޭސް ފޯރުކޮށްދިނުމުގައި އެއްވެސް ދަތިކަމެއް ނެތް ކަމަށެވެ. ރާއްޖެއަށް ގޭސް ފޯރުކޮށްދޭ ފަރާތަކީ ބަންގްލަދޭޝް ފަދަ ގައުމުތަކަށް ވެސް ގޭސް ސަޕްލައިކުރާ ފަރާތެއް ކަމަށްވުމުން، މެދުކެނޑުމެއްނެތި ގޭސް ލިބޭނެކަމުގެ ޔަގީންކަން އޮތްކަން ވަޒީރު ފާހަގަކުރެއްވިއެވެ.
މީގެއިތުރުން، ގޭސް އުފުލަނީ ބޮޑެތި ބޯޓުފަހަރުގައި ކަމަށާއި، އެއަށްފަހު ރާއްޖެއަށް އެތެރެކުރަނީ ކުދި ޓޭންކަރުތަކަށް ބަދަލުކޮށްގެން ކަމަށް ވަޒީރު ވިދާޅުވިއެވެ. އަދި މި ސަރަހައްދަށް ބޭނުންވާ ގޭސް އެއް އުޅަނދުން އަނެއް އުޅަނދަށް ބަދަލުކުރުމުގެ މަސައްކަތް (ޝިޕް-ޓު-ޝިޕް ޓްރާންސްފާ) ގިނަ ފަހަރަށް ކުރިއަށްދަނީ ރާއްޖޭގެ ކަނޑުގެ ސަރަހައްދުގައި ކަމަށްވެސް ވިދާޅުވިއެވެ.
ވަޒީރު ވިދާޅުވި ގޮތުގައި، ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) ގައި މިހާރު ހުރީ 1،000 ޓަނުގެ ގޭސް ރައްކާކުރެވޭނެ ގާބިލުކަމެވެ. މީގެ އިތުރުން، އަމިއްލަ ކުންފުންޏެއް ކަމަށްވާ ވިލާ ގޭހުންވެސް ސްޓޯރޭޖް ފެސިލިޓީއެއް ހިންގަމުންދާއިރު، ދެ ކުންފުނި ގުޅިގެން ގޭސް ފޯރުކޮށްދިނުމުގެ ކަންކަން ދަނީ ބަލަހައްޓަމުންނެވެ.
އެސް.ޓީ.އޯގެ ގޭސް ރައްކާކުރާ މިންވަރު އިތުރުކުރުމަށްޓަކައި 1،500 ޓަނުގެ އާ ފެސިލިޓީއެއް ގާއިމުކުރުމުގެ މަސައްކަތް ކުރަމުންދާ ކަމަށާއި، މި މަޝްރޫޢު މިހާރު އޮތީ ޕްރޮކިއުމަންޓް މަރުހަލާގައި ކަމަށް ވަޒީރު ވިދާޅުވިއެވެ. އުންމީދަކީ މި އަހަރު ނިމުމުގެ ކުރިން މި މަސައްކަތް ނިންމާލުން ކަމުގައި ވިދާޅުވިއެވެ.
”އަޅުގަނޑަށް މަޢުލޫމާތު ލިބިފައިވާ ގޮތުގައި، މި ފެސިލިޓީ ނިމުމުން މާލެ ސަރަހައްދަށް ބޭނުންވާ ދެ މަސް ދުވަހާއި ބައިގެ ގޭސް ރައްކާކުރެވޭނެ،“ ވަޒީރު ވިދާޅުވިއެވެ.
މާލީ ވަޒީރު އިތުރަށް ވިދާޅުވީ، ގޭސް ޝިޕްމަންޓްތައް ބެލެހެއްޓުމުގައި ދިމާވާ އޮޕަރޭޝަނަލް ކަންކަމަށް ރިއާޔަތްކުރާއިރު، ރައްކާކުރެވޭ މިންވަރު އިތުރުކުރުމަކީ ކޮންމެހެން ބޭނުންތެރި ކަމެއް ކަމަށެވެ.
މީގެ އިތުރުން، ރާއްޖޭގެ ތިން ސަރަހައްދެއްގައި ތެޔޮ ރައްކާކުރާނެ ރިޒާވްތައް ގާއިމުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވާކަން ވެސް ވަޒީރު ފާހަގަކުރެއްވިއެވެ. މި މަޝްރޫޢު ކުރިއަށް ގެންދިއުމަށް ހަމަޖެހިފައިވަނީ އެކި މަރުހަލާތަކަށް ބަހާލައިގެންނެވެ. ކޮންމެ މަރުހަލާއެއް ނިންމުމަށް 18 މަސް ދުވަހާއި ދެ އަހަރާ ދެމެދުގެ މުއްދަތެއް ނަގާނެ ކަމަށް ލަފާކުރެވެއެވެ.
