ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަގުވައްޓާލުމުގެ ގޮތުން އެމަނިކުފާނުގެ އިސްތަށިފުޅުގައި އަޅުވަމުންދާ އެއްވެސް ޙަޤީޤަތެއް ނެތް އިލްޒާމްތަކުގެ ސަބަބުން ރާއްޖޭގައި ފިތުނަ އުފެއްދުމުގައި އެންމެ ކުރީގައި އުޅޭ އޮންލައިން ނޫސް ކަމަށްވާ ”އަދަދު“ ނޫސް ބޮއިކޮޓް ކުރުމަށް ގިނަ ބަޔަކު ގޮވަން ފަށައިފިއެވެ.
ތަކުރާރުކޮށް ރައީސް މުޢިއްޒުގެ އިސްތަށިފުޅުގައި އެއްވެސް ޙަޤީޤަތެއް ނެތް އިލްޒާމުތައް އަޅުވަމުންދާ ”އަދަދު“ ނޫހުން އެންމެފަހުން މިވަނީ ”އައިޝާ“ ގެ ނަމުގައި ނެރުނު ޑޮކިއުމެންޓްރީގައި އެމަނިކުފާނުގެ އިސްތަށިފުޅުގައި ޒިނޭގެ ހުތުރުވެގެންވާ ފާފައިގެ ތުޙުމަތުވެސް އަޅުވައިފައެވެ. މިކަން ކުށްވެރިކޮށް ގިނަ ބަޔަކު ވާހަކަދައްކަމުން އަންނައިރު، އޭގެ ތެރޭގައި ރާއްޖޭގެ މަޝްހޫރު ދީނީ ޢިލްމުވެރިން ވެސް ހިމެނެއެވެ.
”އަދަދު“ ނޫހަކީ މިނިވަން ނޫސްވެރިކަމުގެ ނަމުގައި ސިޔާސީ ވަކި މަޤުސަދެއް ހާޞިލުކުރުމަށް މީހުންގެ އަބުރު ކަތިލާ ނޫހެއްގެ ގޮތުގައި އޮންނަނީ އަބަދުވެސް ލޭބަލްވެފައެވެ. މިފަދަ ޢަމަލުތަކުގެ ސަބަބުން ”އަދަދު“ ނޫހުގެ ލިޔުންތައް ކިޔުން ހުއްޓާލުމަށާއި، އެ ނޫހުގެ ލިންކުތައް މީސް މީޑިއާގެ އެއްވެސް މަންސައެއްގައި ޙިއްޞާނުކުރުމަށް ގޮވާލައި މީސް މީޑިއާގެ އެކި މަންސަތަކުގައި ބޮޑު ކެމްޕޭނެއްވެސް މިހާރު ވަނީ ފަށައިފައެވެ. ވަކިން ޚާއްޞަކޮށް އެކްސް އަދި ފޭސްބުކްގައި ”ބޮއިކޮޓް އަދަދު“ ގެ ނަމުގައި ހޭޝްޓެގް ބޭނުންކޮށްގެން އެތައް ހާސް ބަޔަކު އަންނަނީ ”އަދަދު“ ނޫހާ ދެކޮޅަށް ޝުޢޫރު ފާޅުކުރަމުންނެވެ.
ރައީސް މުޢިއްޒުއާ ގުޅުވައިގެން ”އަދަދު“ ނޫހުން ނެރުނު ޑޮކިއުމެންޓްރީއާ ގުޅިގެން އާންމުންގެ ގިނަ ބަޔަކު ބުނަމުންދަނީ، އެ ނޫހުގެ އަމާޒަކީ ރައްޔިތުންނަށް ދޮގު މަޢުލޫމާތު ފޯރުކޮށްދީގެން ރައްޔިތުންގެ ހިތްތަކުގައި ސަރުކާރާމެދު ނަފްރަތު އުފެއްދުން ކަމަށެވެ. މީގެ އިތުރުން އެ ނޫހަކީ އިސްލާމްދީނާ ދުރު ލާދީނީ ފިކުރުގެ އެތަށް ކަމެއް ފަތުރާ ނޫހެއްގެ ގޮތުގައިވެސް އެއްބަޔަކު އަންނަނީ ސިފަކުރަމުންނެވެ. އެގޮތުން އެ ނޫހުން ޝާޢިއުކުރާ ބައެއް ކާޓޫންތަކާއި ޑޮކިއުމެންޓްރީތަކުގައި އިސްލާމީ އުޞޫލުތަކާ ފުށުއަރާ އެތަށްކަމެއް ހުރިއިރު، ދީނީ ޝިޢާރުތަކަށް ފުރައްސާކޮށް ކާޓޫނާ ހަދާފައި ހުންނަކަން ފާހަގަކޮށްލެވެއެވެ.
ދާދި ފަހުން ”އަދަދު“ ނޫހުން މިފަދަ ކާޓޫނެއް ޝާޢިއުކުރުމުގެ ސަބަބުން، މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނުން ވަނީ އެ ކާޓޫނު ނެގުމަށް އެ ނޫހަށް އަންގައިފައެވެ. ނަމަވެސް އެ ނޫހުން އެ ކާޓޫނު ނަގައިފައެއްނުވެއެވެ.
