103 ކުދިންނާއެކު ހުޅުމާލޭގައި ކުރިއަށްގެންދާ ހިލޭ ޤުރުއާން ކްލާސްތައް މިއަދު ފަށައިފިއެވެ.
މި ޤުރުއާން ކްލާސްތަކަކީ ކުޑަކުދިންގެ ހިތްތަކުގައި ޤުރުއާނަށް ހިތްޖައްސައި އަޙުލުވެރިކުރުވުމަށް، ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އާއި އަލް-އަޞްރު ޖަމުޢިއްޔާ ގުޅިގެން ހުޅުމާލޭގައި ކުރިއަށްގެންދާ ޤުރުއާން ކްލާސްތަކެކެވެ.
މިކަމާ ގުޅިގެން އެޗްޑީސީން ބުނީ، މިއީ ހުޅުމާލޭގައި ޤުރުއާން ކްލާސްތައް ކުރިއަށްގެންދިއުމާއެކު ދީނީ ދަރުސް ދިނުމަށް، އަލް-އަޞްރު ޖަމުޢިއްޔާ އާއި އެ ކޯޕަރޭޝަނާއި ދެމެދު މިދިޔަ އަހަރުގެ ސެޕްޓެމްބަރު މަހު ސޮއިކުރި އެމްއޯޔޫގެ ދަށުން ކުރިއަށްގެންދާ ކްލާސްތަކެއް ކަމަށެވެ. އަދި މި ކްލާސްތަކަކީ ބައިވެރިންގެ އަތުން އެއްވެސް ފީއެއް ނެގުމަކާ ނުލައި މުޅިން ހިލޭ ކުރިއަށްގެންދާ ކްލާސްތަކެއް ކަމަށް އެ ކޯޕަރޭޝަނުން ވަނީ މަޢުލޫމާތު ދީފައެވެ.
މި ޤުރުއާން ކްލާސްތަކުގައި ބައިވެރިވުމަށް ހުސްވި ފެބްރުއަރީ މަހު ހުޅުވާލެވި، ރަޖިސްޓްރޭޝަން މަރުޙަލާ މިހާރު ނިމިފައިވާ ކަމަށް އެޗްޑީސީން ބުންޏެވެ. އެގޮތުން މިހާތަނަށް ހަތް އަހަރާއި 10 އަހަރާ ދެމެދުގެ ޖުމްލަ 103 ކުދިން މި ކްލާސްތަކުގައި ބައިވެރިވެފައިވެއެވެ.
މި ޤުރުއާން ކްލާސްތައް މިއަދު ފަށާފައިވާއިރު، ކްލާސްތައް ކުރިއަށްގެންދިއުމަށް ހަމަޖެހިފައިވަނީ އަންހެން އަދި ފިރިހެން ކުދިން ވަކިން ސެޝަންތަކަކަށް ބަހާލައިގެން، ހުޅުމާލޭގެ އެކި މިސްކިތްތަކުގައެވެ. ކްލާސްތަކުގައި ޤުރުއާން ކިޔަވައިދޭ މުދައްރިސުން ހަމަޖެއްސުމާއި، ކިޔަވައިދިނުން ކުރިއަށްގެންދާނީ އަލް-އަޞްރު ޖަމުޢިއްޔާގެ ފަރާތުންނެވެ.
ކުރިއަށް އޮތް ތަނުގައި ވެސް މުޖްތަމައުއަށް ފައިދާހުރި މިފަދަ ގިނަ ދީނީ ޕްރޮގުރާމުތައް ހިންގުމަކީ އެޗްޑީސީގެ އަމާޒެއް ކަމަށް އެ ކޯޕަރޭޝަނުން ވަނީ އިތުރަށް ބުނެފައެވެ.
