ނިމިދިޔަ އެމްޑީޕީ ސަރުކާރުން ކުރިއަށްގެންދިޔަ ބިންވެރިޔާ ސްކީމުގެ ދަށުން ހުޅުމާލޭ ތިންވަނަ ފިޔަވަހިން ދޫކުރާ ގޯތިތައް ލިބުނު ފަރާތްތަކަށް އެ ގޯތިތައް ޙަވާލުކުރުމުގެ މަސައްކަތްތައް ކުރަމުން އަންނަ ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
މިކަމާ ގުޅިގެން އެޗްޑީސީން ބުނެފައިވަނީ، ހުޅުމާލޭ ތިންވަނަ ފިޔަވަހި ސަރވޭ ކުރުމާއި އިންފާރު ވަކިކުރުމުގެ މަސައްކަތްތައް ކޮންސްޓްރަކްޝަން މިނިސްޓްރީއާ ގުޅިގެން އެ ކޯޕަރޭޝަނުން ކުރަމުން އަންނަ ކަމަށެވެ. ފާހަގަކޮށްލަންޖެހޭ ގޮތުގައި ހުޅުމާލެ ތިންވަނަ ފިޔަވަހީގެ ބިން ހިއްކުމުގެ މަސައްކަތަށް ހުއްޓިފައި އޮތުމަށްފަހު މި ސަރުކާރު އައިސް، އަލުން އެ މަސައްކަތް ފަށައި އެއްކޮށް ނިންމާލީ މިދިޔަ ޖަނަވަރީ މަހުގެ ތެރޭގައެވެ.
ހުޅުމާލޭ ތިންވަނަ ފިޔަވަހީގެ މަޝްރޫޢަކީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ޙަވާލުކޮށްގެން ކުރިއަށްގެންދިޔަ މަޝްރޫޢެކެވެ.
ހުޅުމާލޭ ތިންވަނަ ފިޔަވަހިން ދޫކުރާ ގޯތިތަކުގެ އަދަދާއި އެ ތަންތަނުގެ ސައިޒު:
- 1،650 އަކަފޫޓުގެ 181 ގޯތި
- 2،050 އަކަފޫޓުގެ 242 ގޯތި
- 2،450 އަކަފޫޓުގެ 132 ގޯތި
- 2،850 އަކަފޫޓުގެ 62 ގޯތި
- 3،250 އަކަފޫޓުގެ 41 ގޯތި
- 3،650 އަކަފޫޓުގެ 16 ގޯތި
- 4،000 އަކަފޫޓުގެ 24 ގޯތި
މި 698 ގޯތީގެ ގުރުއަތުލީ ނިމިދިޔަ 2025 ވަނަ އަހަރުގެ ޑިސެމްބަރު މަހުގެ ތެރޭގައެވެ.
