މައި ދެ އިންތިޚާބު އެއްދުވަހެއްގައި ބޭއްވިއްޖެނަމަ ދިވެހިރާއްޖޭގައި ހަމަޖެހުން ޤާއިމުވެ އޮންނާނެ ކަމަށް ކުރީގެ ބަންޑާރަނައިބު ޢާއިޝަތު އާޒިމާ ޝަކޫރު ވިދާޅުވެއްޖެއެވެ.
އާޒިމާ މި މޭރުމުން ވިދާޅުވީ، މައި ދެ އިންތިޚާބު ކަމަށްވާ ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްދުވަހެއްގައި ބޭއްވުމާ ގުޅޭގޮތުން ’ޕޮލިސީ އެމްވީ‘ އިން ”ސިޔާސަތު ޚާއްޞަ“ ގެ ނަމުގައި ރޭ ކުރިއަށްގެންދިޔަ ފޯރަމުގައި ވާހަކަ ދައްކަވަމުންނެވެ. މި ފޯރަމުގައި ވާހަކަދައްކަވަމުން އާޒިމާ ވިދާޅުވީ، އައު ޤާނޫނުއަސާސީއަށް ޢަމަލުކުރަން ފެށުނު ފަހުން މިހާތަނަށް އިންތިޚާބުވި އެއްވެސް ރައީސަކަށް ދެވަނަ ދައުރެއް ލިބިފައިނުވާ ކަމަށެވެ.
މިހާރު ޢަމަލުކުރަމުންދާ ޤާނޫނުއަސާސީގެ އޮނިގަނޑު އޮންނަ ގޮތުން ދިވެހީން އަބަދުވެސް ތިބެނީ އިންތިޚާބުތަކެއް ތެރޭގައިކަން ފާހަގަކުރައްވަމުން އާޒިމާ ވިދާޅުވީ، ފަސް އަހަރު ދުވަހުގެ ތެރޭ ތިން އިންތިޚާބު ބޭއްވުމަކީ މައްސަލައެއް ކަމަށް ދެކެވަޑައިގަންނަވާ ކަމަށެވެ. އިންތިޚާބުތައް މަދުވި ނަމަވެސް ޑިމޮކްރަސީއަށް އެއްވެސް ބާވަތެއްގެ ހުރަހެއްގެ އެޅޭނެ ކަމަށް ޤަބޫލުނުކުރައްވާ ކަމަށް އާޒިމާ ވަނީ ވިދާޅުވެފައެވެ.
”ޑިމޮކްރަސީގެ ސުވާލުތޯ މަދުވަނީ، ސުވާލު އަހާ ފަހަރުތޯ މަދުވަނީ، އެއްވެސް ޙާލަތެއްގައި ރައްޔިތުންގެ މަޖިލީހުގެ މެންބަރަކަށް އަޅުގަނޑުގެ ދާއިރާއިން އިންތިޚާބުކުރާނީ މިވެނި މީހަކު، އޭގައި އަޅުގަނޑުގެ ސޭއެއް މަދެއްނުވޭ،“ – އާޒިމާ ވިދާޅުވިއެވެ.
މީގެ އިތުރުން އާޒިމާ ވިދާޅުވީ، ސަރުކާރުން އަބަދު ރައްޔިތުންނަށް ވަޒީފާދީގެން ވެރިކަން ހިންގާ ވިސްނުމަކީ ކޮންމެހެން ބަދަލުކުރަން ޖެހިފައިވާ ވިސްނުމެއް ކަމަށެވެ. އަދި ޤައުމެއްގެ ޙައިސިއްޔަތުން ދިވެހިރާއްޖެއަށް ބޭނުންވަނީ ޤައުމުގެ ޚާރިޖީ ސިޔާސަތާއި ދަރަނީގެ ކަންކަން އަމިއްލައަށް ބެލެހެއްޓޭނެ، ވަރުގަދަ ރިޔާސީ ނިޒާމެއް ކަމަށްވެސް އާޒިމާ ވަނީ އިތުރަށް ވިދާޅުވެފައެވެ.
