ދިވެހިރާއްޖޭގައި ވޭތުވެ ދިޔަ އެތައް ސަރުކާރަކުން އުފެއްދި ބޮޑެތި ދަރަނިތައް ދައްކަމުން ޤައުމު ބަނގުރޫޓުވިޔަނުދީ، ރައްޔިތުންނަށް ވީ ވައުދުތައް ފުއްދުމަށް މުޅި ރާއްޖޭގެ އެކިކަންކޮޅުތަކުގައި ރައީސް މުޢިއްޒުގެ ސަރުކާރުން ފައްޓަވާފައިވާ ތަރައްޤީގެ މަސައްކަތްތައް ފެނިވަޑައިގެން އަޖާއިބުވެ އަންތަރީސްވެއްޖެ ކަމަށް ޖުމްހޫރީ ޕާޓީގެ ލީޑަރ އޮނަރަބަލް ޤާސިމް އިބްރާހިމް ވިދާޅުވެއްޖެއެވެ.
ޤާސިމް މިފަދައިން ވިދާޅުވީ ޓީވީއެމްގެ “ ހޭލުން“ ޕްރޮގްރާމްގައި ވާހަކަފުޅު ދައްކަވަމުންނެވެ. ރައީސް ޑރ. މުޢިއްޒުއަށާއި އަދުގެ ސަރުކާރަށް ވަރަށްބޮޑަށް ތަޢުރީފް ކުރައްވާ ޤާސިމް ވިދާޅުވީ މިއަށްވުރެ ބޮޑަށް ރައްޔިތުންނަށް އަޅާލާ. އިޚުލާސްތެރިކަމާއެކު ވެރިކަން ކުރައްވާ ރައީސެއް މިހާތަނަށް އަދި ފެނިވަޑައިގެންފައިނުވާ ކަމަށެވެ.
”އަޅުގަނޑަށް ފެނުނުތަނުގައި، މިއަށްވުރެ ވަފާތެރިކޮށް، އިޚުލާސްތެރިކޮށް، އަމާނާތްތެރިކޮށް، އިންސާނިއްޔަތުކަން ހުރެގެން މީހުންނާއި ދޭތެރޭ ކަންތައްކުރި މީހަކުނެތް، މިފަދަ ނިކަމެތި ހާލަތުގަ މިފަދަ ބޮޑު ދަރަނީގެ ތެރޭގައި އޮއްވާ، ރަށްރަށަށްގޮސް އެ ވެވަޑައިގެންފައިވާ ވައުދުތައް ފުއްދުމަށްޓަކާ އެކުރައްވާ މަސައްކަތްތަކަށް އަޅުގަނޑު ދަންނަވާނެ އެއްޗެއްވެސް ނެތް. އަޅުގަނޑު މިހުރީ އަންތަރީސް ވެފައި“ ޤާސިމް ވިދާޅުވިއެވެ.
ހަމަމިއާއެކު ދަޢުލަތަށް އާމްދަނީ ހޯދުމަށްޓަކާ ރައްޔިތުންއަތުން އިންތިހާއަށް ޓެކްސް ނަގަމުންދާން ޖެހިފައިވަނީވެސް ކުރީގެ ސަރުކާރުތަކުން ޤައުމު ދަރަނިން ސަލާމަތް ނުވާވަރު ކޮށްފައި އޮތުމުން ކަމަށް ޤާސިމް ވިދާޅުވިއެވެ. މިކަންކަމަށް ހައްލު ގެނައުމަށްޓަކައި ސަރުކާރުން ގިނަ ގުނަ މަސައްކަތްތަކެއް ކުރަމުންދަނިކޮށް މެދު އިރުމަތީގެ ހަނގުރާމައިގެ ސަބަބުން ދުނިޔޭގެ އިޤްތިޞާދަށް މި އަންނަ ހީނަރުކަމާއި އެކު އޭގެ އަސަރުތައްވެސް ދިވެހިރާއްޖޭން ތަޖުރިބާކުރަން ޖެހިފައިވާ ކަން ޤާސިމް ފާހަގަކުރެއްވިއެވެ. އެހެން ކަމުން މިހުރިހާ ޙާލަތެއް ކުރިމަތީގައި އޮއްވާ ސިޔާސީ މަންފާއަށް ވެރިކަން ބޭނުންވެގެން ޤައުމުގައި ހަޅުތާލު ހަދަން އުޅެގެން ނުވާނެ ކަމަށާއި، ސިޔާސީ ފަރާތްތަކުންވެސް ވިސްނަންވާނީ ޤައުމުގެ ރައްޔިތުންގެ އަމާންކަމާއި، ސަލާމާތްތެރި ކަމަށް ކަމުގައި ޤާސިމް ވިދާޅުވިއެވެ.
މިއާއިއެކު ޤާސިމް އުފެއްދެވި ސުވާލަކީ އިދިކޮޅު އެމްޑީޕީން މިދިޔަ 5 އަހަރު ވެރިކަމުގައި ތިއްބެވިއިރު، އެބޭފުޅުން ވެރިކަމަށް އަންނަން 2018 ގައި ވީ ވަޢުދުތައް ފުއްދުނުތޯއެވެ. އަދި އެމްޑީޕީން ވެރިކަމަށް އަންނަންވެގެން ދެއްކި ވާހަކަތައް ހަގީގަތަށް ހެދުނުތޯ ޤާސިމް ސުވާލު ކުރެއްވިއެވެ.
ސާބަހޭ އޮނަރަބަލް ގާސިމް އިބްރާހިމް ތިހެން ތިއްބަވާނީ ޤައުމަޢް އިޚްލާސްތެރި ވަފާތެރިން އަދިވެސް އެއްފަހަރު ޤާސިމް އިބްރާހިމްއަޢް ހިފެހެއްޓމެއްނެތީ ޝުކުރާ މުބާރިކއބާދު އަރިސްކުރަން