ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި މާލެ ސިޓީގެ މޭޔަރު ކަމަށް ކޮންގްރެސް ޕާޓީގެ ފަރާތުން ވާދަކުރައްވާ ކެންޑިޑޭޓް މޫސާ ޢަލީ ޖަލީލަށް ތާއީދުކުރައްވާ ކަމަށް ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު އަދި މަޝްހޫރު ވިޔަފާރިވެރިޔާ ޤާސިމް އިބްރާހިމް ވިދާޅުވެއްޖެއެވެ.
މޫސާ ޢަލީ ޖަލީލަށް ތާޢީދުކުރައްވާކަން ހާމަކުރަައްވަމުން އެކްސްގައި ޙިއްޞާކުރެއްވި ޕޯސްޓެއްގައި ޤާސިމް ވިދާޅުވީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ޕީއެންސީގެ ފަރާތުން މާލޭ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓް މޫސާ ޢަލީ ޖަލީލަށް ތާއީދުކުރައްވަން ނިންމަވާފައިވާ ކަމަށެވެ. އެ ޕޯސްޓުގައި ޤާސިމް ވިދާޅުވީ މޫސާ ޢަލީ ޖަލީލަކީ، ޤައުމީ ޚިދުމަތުގެ ފަޚުރުވެރި ރެކޯޑްތަކެއް އޮތް، ދިވެހިރާއްޖޭގެ ދިފާޢުގައި އަގުހުރި ޚިދުމަތްތަކެއް ކުރައްވާފައިވާ ބަޠަލެއް ކަމަށެވެ.
”ހަމައެކަނި 1988 ވަނަ އަހަރުގެ ނޮވެމްބަރު މަހުގެ ތިންވަނަ ދުވަހު ރާއްޖެއަށް ކުރިމަތިވި ޢުދުވާނީ ހަމަލާއިން ޤައުމު ސަލާމަތްކުރެއްވުމަށް، މޭ އައްޑަނައެއްގެ ގޮތުގައި ހައްދަވައިގެން ދުޝްމަނުންގެ ކުރިމައްޗަށް ހިތްވަރާއި އީމާންތެރިކަމާއެކު ނުކުންނެވުމުންވެސް އެމަނިކުފާނުގެ ގަދަފަދަ ޤައުމީ ޢަޒުމު ސާބިތުކޮށްދޭ،“ – ޤާސިމް ވިދާޅުވިއެވެ.
އެއިރުއްސުރެ މިއަދާ ހަމައަށްވެސް މޫސާ ޢަލީ ޖަލީލު ހުންނެވީ ޤައުމަށް ޚިދުމަތްކުރަން ތައްޔާރަށްކަން ފާހަގަކުރައްވަމުން ޤާސިމް ވިދާޅުވީ، ކޮންމެ ސަރުކާރަކުން މަތިކުރެއްވި ކޮންމެ ވަޒީފާއެއްގެ ވާޖިބުވެސް ޖަލީލު އަދާކުރެއްވީ ތެދުވެރިކަމާ އެކުގައި ކަމަށެވެ. މޫސާ ޢަލީ ޖަލީލަކީ ފަސްބައިގާ ކިލަނބުކަމެއް ނެތް، އެއްވެސް މީހަކާމެދު ކުޑައިމީސްކޮށް ނުހައްދަވާ، ޚުލްޤު ހެޔޮ އަދި އެންމެންގެ ލޯބި ލިބިވަޑައިގެންފައިވާ ތަޖުރިބާކާރު ޝަޚްޞިއްޔަތެއް ކަމަށްވެސް ޤާސިމް ވަނީ ވިދާޅުވެފައެވެ.
”މި ހުރިހާ ޙަޤީޤަތްތަކެއް މިހެން ހުރީތީވެ، ރާއްޖޭގެ ވެރިކަންކުރާ ޝަހަރު ހިންގެވުމުގެ އެންމެ އިސް މަޤާމަށް މޫސާ ޢަލީ ޖަލީލަށްވުރެ ތަޖުރިބާކާރު، އަމާނާތްތެެރި، ޚިދުމަތްތެރި، ޤާބިލް، ކުފޫހަމަވާ އެހެން ކެންޑިޑޭޓަކު ނެތްކަން ޔަޤީން،“ – ޤާސިމް ވިދާޅުވިއެވެ.
ޤާސިމް ވަނީ މި ފަހަރުގެ ލޯކަލް ކައުންސިލްތަކުގެ އިންތިޚާބުގައި މާލޭ ސިޓީއަށް ނިސްބަތްވާ ހުރިހާ ރައްޔިތުން މޫސާ ޢަލީ ޖަލީލަށް ވޯޓުދިނުމަށް އެދިވަޑައިގެންފައެވެ.
