ދަޢުލަތުގެ ބެލުމުގެ ދަށުގައި ތިބޭ ކުދިން ފޯސްޓަރ ކުރާ ޢާއިލާތަކަށް، އެ ކުއްޖާއާއެކު ވަގުތު ހޭދަކުރުމަށްޓަކައި ޚާއްޞަ ޗުއްޓީއެއް ދިނުމަށް ސަރުކާރުން ނިންމާފައިވާ ކަމަށް ފެމިލީ އެންޑް ސޯޝަލް ޑިވެލޮޕްމަންޓް މިނިސްޓަރު ޢާއިޝަތު ޝިހާމް ވިދާޅުވެއްޖެއެވެ.
މިނިސްޓަރު ޢާއިޝަތު ޝިހާމް މި މޭރުމުން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެކަމާ ގުޅޭގޮތުން ނޫސްވެރިންނަށް މަޢުލޫމާތު ދެއްވަމުންނެވެ. މިނިސްޓަރު ވިދާޅުވީ، ދަޢުލަތުގެ ބެލުމުގެ ދަށުގައި ތިބޭ ކުދިން ޢާއިލާތަކާ ޙަވާލުކުރުމުގެ މަރުޙަލާ މީގެ ކުރިން އޮތް ގޮތުން ވަރަށް ބޮޑަށް ދިގުލައިގެންދާ ކަމަށެވެ.
މިކަމުގެ ސަބަބުން އެފަދަ ކުދިން ބަލަން ބޭނުންވާ ޢާއިލާތަކަށް ގިނަ ގޮންޖެހުންތަކާ ކުރިމަތިލާންޖެހޭ ކަމަށާއި، އެހެންކަމުން ”ޓެމްޕޮރަރީ ފޯސްޓަރިންގ“ ގެ ނަމުގައި ވަގުތީ ގޮތުން އެފަދަ ކުދިން ޢާއިލާތަކާ ޙަވާލުކުރެވޭނެ ފަސޭހަ އިންތިޒާމުތަކެއް މިހާރު ކަނޑައަޅާފައިވާ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވީ އަލަށް ދަޢުލަތުގެ ބެލުމުގެ ދަށުގައި ތިބޭ ކުދިން ފޯސްޓަރ ކުރަން ބޭނުންވާ ފަރާތްތަކަށް ލިބޭ ޗުއްޓީއަކީ އަންހެނުން ވިހެއުމުން ލިބޭ މެޓަރނިޓީ ލީވްއާ އެއްފަދަ އުޞޫލަކުން ދެވޭ ޗުއްޓީއެއް ކަމަށެވެ. ހަމައެހެންމެ، އަންނަ އޭޕްރީލް މަހު އެފަދަ ފަރާތްތަކަށް ޗުއްޓީ ލިބޭނެގޮތް މިހާރު ހަމަޖެހިފައިވާ ކަމަށް ވެސް މިނިސްޓަރު ވަނީ ވިދާޅުވެފައެވެ.
”ރައީސުލްޖުމްހޫރިއްޔާގެ އިރުޝާދުގެ ދަށުން ސިވިލް ސަރވިސްގައި މަޝްވަރާކުރެވިގެން އިރާދަކުރެއްވިއްޔާ މި އެޕްރީލް މަހު ފޯސްޓަރ ކުރާ ފަރާތްތަކަށް ވެސް ޚާއްޞަ ޗުއްޓީއެއް ނުވަތަ ޚާއްޞަ ލީވްއެއް ލިބޭގޮތަށް މިހާރު ހަމަޖެހިފައި އެއޮތީ. އެއީ ކުދިންނާ ޙަވާލުވާން ތިބި ފަރާތްތަކަށް ލިބިގެންދާ ވަރަށް ބޮޑު ލުޔަކަށްވެގެންދާނެ،“ – މިނިސްޓަރު ޢާއިޝަތު ޝިހާމް ވިދާޅުވިއެވެ.
ދަޢުލަތުގެ ބެލުމުގެ ދަށުގައި ތިބޭ ކުދިން ފޯސްޓަރ ކުރާ ޢާއިލާތަކުގެ ތެރެއިން މާލީ ގޮތުން އެހީތެރިކަން ބޭނުންވާ ޢާއިލާތަކުން ފޯސްޓަރ ކުރާ ކޮންމެ ކުއްޖަކަށް، މަހެއްގެ މައްޗަށް 5،000 ރުފިޔާގެ ޚާއްޞަ އެލަވަންސެއް ދިނުމަށް ސަރުކާރުން ނިންމާފައިވާ ކަމަށް މިނިސްޓަރު ޢާއިޝަތު ވަނީ އިތުރަށް ވިދާޅުވެފައެވެ.
17 ނޮވެމްބަރު 2023 އިން ފެށިގެން މިހާތަނަށް، ދަޢުލަތުގެ ބެލުމުގެ ދަށުގައި ތިބޭ ކުދިންގެ ތެރެއިން ޖުމްލަ 111 ކުއްޖަކު، އެކި ޢާއިލާތަކާ ސަރުކާރުން ވަނީ ޙަވާލުކޮށްފައެވެ. މިއީ އެ ކުދިންނަށް ރައްކާތެރިކަމާއި ޢާއިލީ ލޯތްބާއެކު ދިރިއުޅެވޭނެ މަގު ފަހިކޮށްދިނުމުގެ ގޮތުން ސަރުކާރުން ކުރަމުން އަންނަ ވަރަށް މުހިއްމު މަސައްކަތެކެވެ.
