ވެލާނާ އިންޓަރނޭޝަނަލް އެއަރޕޯޓު (ވީއައިއޭ) ގެ ޓްރެފިކް ފްލޯއަށް ބަދަލުތަކެއް ގެނެސްފިއެވެ.
މިކަމާ ގުޅިގެން އެ އެއަރޕޯޓު ބަލަހައްޓާ ކުންފުނި ކަމަށްވާ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފައިވަނީ، ވީއައިއޭގެ ޓަރމިނަލް 2 ބޭނުންކުރާ ފަސިންޖަރުންނަށް ލުއިފަސޭހަ އިންތިޒާމުތަކެއް ހަމަޖައްސައިދިނުމުގެ ގޮތުން މިއަދު ހެނދުނު 10:00 އިން ފެށިގެން ޓަރމިނަލް 2 ގެ ކުރިމައްޗަށް އޮންނަ ސަރަޙައްދަކީ ފަސިންޖަރުންނަށް ޓެކްސީތަކަށް އަރައި ފޭބޭނެ ސަރަޙައްދެއް ކަމުގައި ކަނޑައެޅިފައިވާ ކަމަށެވެ.
މި އިންތިޒާމުގެ ދަށުން ޓަރމިނަލް 2 ގެ އެރައިވަލްގެ ކުރިމަތިން ބުރާއި ދެމެދުގައިވާ ސަރަޙައްދަކީ ފަސިންޖަރުން ބޭލުމަށް ޚާއްޞަކުރެވިފައިވާ ސަރަޙައްދެއް ކަމަށް ވަނީ ކަނޑައެޅިފައެވެ. މި ސަރަޙައްދުގައި ފަހަރަކު ހަތަރު ޓެކްސީއަށް މަޑުކުރެވޭނެ ސްލޮޓްތައް ފާހަގަކުރެވިފައި ހުންނާނެ ކަމަށް އެމްއޭސީއެލް އިން މަޢުލޫމާތުދެއެވެ.
މީގެ އިތުރުން ޓަރމިނަލް 2 ގެ ޑިޕާޗަރ ކުރިމަތިން ބުރާއި ދެމެދުގައިވާ ސަރަޙައްދަކީ ފަސިންޖަރުން ޓެކްސީއަށް އެރުމަށްޓަކައި ޚާއްޞަ ކުރެވިފައިވާ ސަރަހައްދެއް ކަމަށާއި އެ ސަރަޙައްދުގައި ފަހަރަކު ފަސް ޓެކްސީއަށް މަޑުކުރެވޭނެ ސްލޮޓްތައް ފާހަގަކުރެވިފައި ހުންނާނެ ކަމަށްވެސް އެމްއޭސީއެލް އިން ވަނީ މަޢުލޫމާތު ދީފައެވެ.
އަލަށް މި ގެނެވުނު ބަދަލަށް އާންމުން އަޙުލުވެރިކޮށް ޓްރެފިކް ފްލޯ މެނޭޖްކުރުމަށްޓަކައި އެމްއޭސީއެލްގެ މުވައްޒަފުން އެ ސަރަޙައްދުގައި ހަރަކާތްތެރިވަމުން ގެންދާނެއެވެ.
