މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ރާއްޖެއަށް ބޭނުންވާ ކާބޯތަކެތި ގެނައުމުގައި އެއްވެސް ކަހަލަ ދަތިކަމެއް ނެތް ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
މިނިސްޓަރު ސަޢީދު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ. މިނިސްޓަރު ވިދާޅުވީ، ހަނގުރާމައާ ގުޅިގެން ރާއްޖެއަށް މުދާ އެތެރެކުރާ ބައެއް މާކެޓުތަކަށް އަސަރުކޮށްފައިވާތީ، އެކަމުގެ ސަބަބުން ރާއްޖެއަށް ކުރާ އަސަރުތައް ކުޑަކުރުމަށްޓަކައި، ރާއްޖެއަށް ބޭނުންވާ އެންމެ މުހިންމު އަސާސީ ބާވަތްތައް މެދުކެނޑުމެއްނެތި ލިބޭނެ ގޮތްތައް ހޯދުމުގެ މަސައްކަތް ކުރަމުން އަންނަ ކަމަށެވެ.
އެކި ޤައުމުތަކާއެކު މިކަމުގައި މަޝްވަރާ ކުރެވެމުން އަންނަކަން ފާހަގަކުރައްވަމުން މިނިސްޓަރު ވިދާޅުވީ، މީގެ ކުރިން ރާއްޖެއަށް މުދާ ނުގެންނަ ޤައުމުތަކާއެކުގައިވެސް މިކަމުގައި މަޝްވަރާ ކުރެވެމުން އަންނަ ކަމަށެވެ. އަދި ހަމައެހެންމެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުު އުފެއްދެވި މިނިސްޓަރުންގެ ޚާއްޞަ ކޮމިޓީންވެސް މިކަމާ ގުޅިގެން ވަރަށް މުހިއްމު މަސައްކަތްތަކެއް ކޮށްފައިވާ ކަމަށް މިނިސްޓަރުގެ ވާހަކައިގައި ވަނީ ފާހަގަކުރައްވައިފައެވެ.
ރާއްޖެއަށް އެންމެ ގިނައިން މުދާ އެތެރެކުރާ ޔޫއޭއީ ހަނގުރާމައިގެ ސަބަބުން ބަންދުކޮށްފައި އޮތް ނަމަވެސް، ރާއްޖެއަށް ހުރިހާ ބާވަތެއްގެ މުދާ ފަސޭހަކަމާއެކު ޗައިނާއިން ގެނެވޭނެކަން ފާހަގަކުރައްވަމުން މިނިސްޓަރު ވިދާޅުވީ، ތައިލެންޑް، ކެމްބޯޑިއާ އަދި މެލޭޝިއާ ފަދަ ޤައުމުތަކާއެކު އޮތް ގުޅުން މިހާރަށްވުރެ އިތުރަށް ހަރުދަނާކޮށް، މުދާ ގެނެވޭނެ މަގުތައް ހޯދަމުގެ މަސައްކަތް ކުރަމުން އަންނަ ކަމަށެވެ.
މިނިސްޓަރު އިތުރަށް ވިދާޅުވީ، ވައިގެ މަގުންނާއި ކަނޑުމަގުން މުދާ ގެނައުމަށް އިތުރު މަގުތަކެއް ހޯދަމުން އަންނަ ކަމަށެވެ.
