މާލޭ ސަރަޙައްދުގައި ސަރުކާރުން ފެށުމަށް ނިންމާފައިވާ ޓެކްސީ ލައިންގެ ޚިދުމަތަށް ގުޅޭނެ ހޮޓްލައިން ނަންބަރު މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
މާލޭ ޓެކްސީގެ ނަމުގައި މާލޭ ސަރަޙައްދުގައި ފަށާ މި ޚިދުމަތަކީ، އާންމު ދަތުރުފަތުރު ކުރުމުގައި ދިމާވާ ދަތިތަކަށް ޙައްލެއް ހޯދައިދިނުމުގެ ސަރުކާރުން ފަށަން ނިންމާފައިވާ ޚިދުމަތެކެވެ. މި ޚިދުމަތް ދިނުމަށް ނިންމާފައިވަނީ މޯބައިލް ފޯނު އެޕްލިކޭޝަނެއް މެދުވެރިކޮށް ޓެކްސީއަށް އެދެވޭ ގޮތަށެވެ. މި ޚިދުމަތަކީ މެދުކެނޑުމެއްނެތި 24 ގަޑިއިރު ލިބެން ހުންނާނެ ޚިދުމަތެއް ކަމަށް އެމްޓީސީސީން ވަނީ ބުނެފައެވެ.
ޓެކްސީގެ ޚިދުމަތް ފެށުމަށް ބޭނުންކުރާ އުޅަނދުތަކަކީ ރާއްޖޭގެ މާޙައުލާ އެންމެ އެކަށޭނަގޮތަށް ބަދަލުތަކެއް ގެނެސްގެން ބޭނުންކުރާ އުޅަނދުތަކެކެވެ. އެގޮތުން ޓްރާންސްޕޯރޓް މިނިސްޓަރު މުޙައްމަދު އަމީން މީގެ ދުވަސްކޮޅެއް ކުރިން ވިދާޅުވީ، ޓެކްސީ ޚިދުމަތް ފެށުމަށް ބޭނުންކުރާ އުޅަނދުތަކަށް ރާއްޖޭގެ މާޙައުލާ ގުޅޭ ބަދަލުތައް ގެނެސް މިހާރު ނިމިފައިވާ ކަމަށެވެ.
ރާއްޖެއަކީ ޖަޒީރާ ރަށްތަކެއްގެ މައްޗަށް އެކުލެވިގެންވާ، މޫދާ ކައިރި ސަރަޙައްދުތަކެއްގައި އުޅަނދު ދުއްވަން ޖެހޭ ޤައުމަކަށްވާތީ، އެ އުޅަނދުތަކުގެ އިލެކްޓްރޯނިކް ވަސީލަތްތަކަށް އެކަމާ ގުޅޭ ބަދަލުތައް ގެންނަން ޖެހުނުކަން މިނިސްޓަރު އަމީން ފާހަގަކުރެއްވިއެވެ.
މާލޭ ސަރަހައްދުގައި ސަރުކާރުގެ ޓެކްސީ ލައިންގެ ޚިދުމަތް ފެށުމަށް އެމްޓީސީސީން ޓްރާންސްޕޯރޓު މިނިސްޓްރީއާއެކު އެއްބަސްވުމެއްގައި ސޮއިކޮށްފައިވަނީ 15 ފެބްރުއަރީ 2025 ވަނަ ދުވަހުއެވެ.
ޓެކްސީ ލައިން ޚިދުމަތް ދޭނީ ތަފާތު ތިން މޮޑެލެއްގެ ކާރު ބޭނުންކޮށްގެންނެވެ. އެ ކާރުތައް ރާއްޖެ ގެނައުމުގެ މަސައްކަތް، މިހާރު ކުރަމުން އަންނައިރު، މި ޚިދުމަތް ދިނުމަށް ތައިލެންޑުން ޖުމްލަ 60 ކާރު ގެނައުމަށް ވަނީ ހަމަޖެހިފައެވެ. ދެން ބާކީ ކާރުތައް ގެންނާނީ ޗައިނާއިންނެވެ. އެ ޤައުމުން ދެ މޮޑެލެއްގެ ކާރު ގެންނާނެއެވެ.
ޓެކްސީ ލައިންގެ ޚިދުމަތް ފެށުމަށް ހަމަޖެހިފައިވަނީ ޖުމްލަ 150 ކާރާއެކުގައި ކަމަށް ސަރުކާރުން މީގެ ކުރިން ވަނީ ބުނެފައެވެ.
