ޔަހޫދީ ދަޢުލަތާއި އެމެރިކާ އިސްވެ އީރާނަށް ދިން ނިރުބަވެރި ހަމަލާތަކާ ގުޅިގެން، މެދުއިރުމަތީގައި މިހާރު ހިނގަމުން އަންނަ ހަނގުރާމާގައި ޢަރަބި އިސްލާމީ އެއްވެސް ޤައުމަކަށް އީރާނުން ހަމަލާތައް އަމާޒުކޮށްގެން ނުވާނެ ކަމަށާއި، ހަމަލާދޭނަމަ ހަމައެކަނި އިޒުރޭލަށް އަމާޒުކޮށް ހަމަލާދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ގޮވާލައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް މުޢިއްޒު ވިދާޅުވީ، މެދުއިރުމަތީގައި މިހާރު ހިނގަމުންދާ ހަނގުރާމައިގައި ހަމަލާދޭ އެއްވެސް ފަރާތަކުން އެ ދެނީ ދީގެންވާނެ ހަމަލާތަކެއް ނޫން ކަމަށެވެ. މި ހަނގުރާމައާ ދިވެހި ސަރުކާރުން ދެކޮޅުކަން ފާހަގަކުރައްވަމުން އެމަނިކުފާނު ވިދާޅުވީ، އެއްވެސް ޤައުމެއްގެ މިނިވަންކަމާއި އިސްތިޤުލާލު ނަގާލާގޮތަށް ހަމަލާދިނުމަކީ ކޮށްގެންވާނެ ކަމެއްނޫން ކަމަށެވެ.
”އެ ހަނގުރާމަ ޖެހޭނީ މިހާރުން މިހާރަށް ހުއްޓާލަން، ހަނގުރާމައިގައި ހަމަލާދޭ އެއްވެސް ފަރާތަކުން ދެމުން އެ ދަނީ ދީގެންވާނެ ހަމަލާތަކެއް ނޫން، އީރާނުން ހަމަލާ ދެންޏާ ދޭން ޖެހޭނީ ސީދާ އިޒުރޭލަށް، އެއީ އަޅުގަނޑުމެން ޤަބޫލުކުރާ ގޮތް. އިޒުރޭލަށް ހަމަލާ ދޭންވީ ހަމަ ރެއާއި ދުވާލު، އަޅުގަނޑުމެން ވަރަށް ބޭނުން އެކަން އެގޮތަށް ދާން،“ – ރައީސް މުޢިއްޒު ވިދާޅުވިއެވެ.
މީގެ އިތުރުން މެދުއިރުމަތީގައި ހުރި އެމެރިކާގެ އަސްކަރީ ބޭސްތަކާއި މުދަލަށް ގެއްލުންދިނުމުގައި ވެސް އެ ސަރަޙައްދުގައި ދިރިއުޅޭ މުސްލިމުންނަށް ގެއްލުން ނުވާނޭހެން އެތަންތަނަށް ގެއްލުން ދިނުމަށް ރައީސް ވަނީ ގޮވާލައްވައިފައެވެ. ނަމަވެސް އެއްވެސް ވަރަކަށް ބެލުމެއްނެތި މުސްލިމް ޤައުމުތަކަށް ހަމަލާތައްދޭނަމަ މަރުވެގެން ދާނީ ހަމަ މުސްލިމުން ކަމަށާއި ހަލާކުވެގެންދާނީ ވެސް މުސްލިމުންގެ ތަންތަން ކަމަށް އެމަނިކުފާނު ވިދާޅުވިއެވެ.
މީގެ އިތުރުން އިޒުރޭލަކީ ދިވެހި ސަރުކާރުންވެސް އަދި ދިވެހި ރައްޔިތުންވެސް ބަލައިގަންނާނޭ ބައެއް ނޫންކަން ފާހަގަކުރައްވަމުން ރައީސް މުޢިއްޒު ވިދާޅުވީ، މިއަދާ ހަމައަށް އައިއިރު، އެތައް ޒަމާނެއް ވަންދެން ފަލަސްޠީނުގެ ރައްޔިތުންނަށް އެ މީހުން ކުރިމަތިކުރަމުން އައި ނިކަމެތިކަމަކީ ދިވެހި ރައްޔިތުން އެއްގޮތަކަށްވެސް މަޢާފުކުރާނޭ ކަމެއް ނޫން ކަމަށެވެ.
