އެމްޑީޕީއެއް މިހާރު ނެތް ކަމަށާއި، އެ ޕާޓީގެ އިސް ސަފުގައި މިއަދު ތިބީ ޑީއާރުޕީ މީހުން ކަމަށް މާލޭ ސިޓީގެ ފުރަތަމަ މޭޔަރު ސަރަނގު އާދަމް މަނިކު ވިދާޅުވެއްޖެއެވެ.
ސަރަނގު އާދަމް މަނިކު މި މޭރުމުން ވިދާޅުވީ، ޕީއެންސީން މިއަދު ކުރިއަށްގެންދިޔަ ދޮރުން ދޮރަށް ހަރަކާތުގައި ބައިވެރިވެވަޑައިގެން، މޫސާ ޖަލީލުއާއި ބައްދަލުކުރެއްވުމަށްފަހު، މީޑިއާތަކަށް ދެއްވި އިންޓަވިއުއެއްގައެވެ. ސަރަނގު އާދަމް މަނިކު ވިދާޅުވީ، މިއަދު އޭނާ އެ ވާހަކަ ދެއްކެވި ނަމަވެސް، އެއްވެސް ބަޔަކަށް އެ ވާހަކަ ކަމަކުނުދާނެ ކަމަށެވެ.
”ކޮބާތޯ ޑީއާރުޕީއަށް ނިސްބަތްނުވާ މީހަކު ދައްކަވަބަލަ އެމްޑީޕީގެ އިސް ސަފުން، އެހެންވީމަ އެއީ އެމްޑީޕީއެއް ނޫނޭ އިނގޭތޯ، ހަނދާން ނެތެންނޫންތޯ އެއީ އަޅުގަނޑުމެންނާ ދިމާލަށް މުގުރުބުރި ހިފައިގެން ދުވި މީހުންނެއް ނޫންތޯ މިއަދު އެ ތިބީ، ޢަބްދުﷲ ޝާހިދަކީ ކާކުތޯ؟، ފައްޔާޒަކީ އެމްޑީޕީ މީހެއްތޯ؟،“ – ސަރަނގު އާދަމް މަނިކު ވިދާޅުވިއެވެ.
އެމްޑީޕީ އުފެއްދެވުމުގައްޔާއި އެ ޕާޓީގައި ޕާޓީއެއްގެ ސިފަ ޖެއްސުމުގައި އިސްކޮށް ހަރަކާތްތެރިވެފައިވާކަން ފާހަގަކުރައްވަމުން ސަރަނގު އާދަމް މަނިކު ވިދާޅުވީ، އެމްޑީޕީއަށް ފުރަތަމަ ދައުރުގައި ވެރިކަން ކުރަން ފުރުޞަތު ލިބުނީވެސް އެ ޕާޓީގެ އަސްލު ޙަޤީޤީ މެންބަރުންގެ ބުރަ މަސައްކަތުގެ ސަބަބުން ކަމަށެވެ. ނަމަވެސް މިއަދު އެ ޕާޓީގެ އިސް ސަފުގައި ތިއްބެވި ބޭފުޅުން އެކަން މިއަދު ހަނދާންވެސް ނެތް ކަމަށް އޭނާ ވިދާޅުވިއެވެ.
ސަރަނގު އާދަމް މަނިކު އިތުރަށް ވިދާޅުވީ، އެމްޑީޕީ އެމްޑީޕީއަށްވުމަށްފަހުގައި އަލުން އެ ޕާޓީގެ މަސައްކަތްތަކުގެ އިސް ސަފުން ފެނިގެންދާނެ ކަމަށެވެ. އޭގެ މާނައަކީ އެމްޑީޕީން ވަކިވެ އެހެން ސިޔާސީ ޕާޓީއަކާ ގުޅެން އުޅެނީ ނޫން ކަމަށްވެސް އޭނާ ވަނީ ވިދާޅުވެފައެވެ.
ފާހަގަކޮށްލަންޖެހޭ ގޮތުގައި ޕީއެންސީން މިއަދު ކުރިއަށްގެންދިޔަ ދޮރުން ދޮރަށް ހަރަކާތުގައި ސަރަނގު އާދަމް މަނިކު ވަނީ، ކުރިއަށް އޮތް ލޯކަލް ކައުންސިލްތަކުގެ އިންތިޚާބުގައި ޕީއެންސީގެ ފަރާތުން މާލޭ ސިޓީގެ މޭޔަރު ކަމަށް ވާދަކުރައްވާ މޫސާ ޢަލީ ޖަލީލަށް ތާއީދުކުރައްވާކަން ހާމަކުރައްވައިފައެވެ.
