ރިޔާސީ އިންތިހާބުގައި ވީ ވައުދާއި އެއްގޮތަށް އަންނަ ހަފްތާގެ ތެރޭގައި ކުރީ ސަރުކާރުން ނިންމި ފްލެޓްތަކުގެ ރެޖިސްޓްރީ ހަވާލު ކުރަން ފަށާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް ޑރ. މުޢިއްޒު ވިދާޅުވީ ގޯތި އަދި ފްލެޓް ލިބޭނެ ކަމަށް ފައިނަލް ލިސްޓުގައި ހިމެނި ގެޒެޓްކޮށްފައިވާ ފަރާތްތަކަށް ރަޖިސްޓްރީ ހޯދައިދީ ގޯއްޗާއި ފްލެޓް ހަވާލު ކުރުމަކީ ވީ ވަޢުދާއި އެއްގޮތަށް ކުރިޔަށްދާނެ ކަމެއް ކަމަށެވެ.
މިހަފްތާއާ އަންނަ ހަފްތާ ތެރޭގައި ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިން މިނިސްޓްރީން ކުރިޔަށް ގެންދާނެ
– ރައީސް ޑރ. މުޢިއްޒު
Goathi adhi flat libeyne kamah final list gai himeni gazette koffaivaa faraaithakah registry hadhaidhee goathi/flat havaalu kurumakee alhugandu vaudhu vee gothah kuriyah dhaane kameh. Mi hafthaa aa mianna hafthaa therey registry havaalukoh nimmumuge masakkai Housing Ministry in…
— Dr Mohamed Muizzu (@MMuizzu) January 2, 2024
ރައީސް ޑރ. މުޢިއްޒު އިތުރަށް ވިދާޅުވީ ގޯތި ދީފައިވާ ބައެއް ތަންތަނަކީ ނުހިއްކާ ހުރި ތަންތަން ކަމުން އެތަންތަން ހިއްކުމުގެ މަސައްކަތް ބާރު ސްޕީޑުގައި ކުރިޔަށް ދާނެ ކަމަށެވެ. އަދި ކުރިން އެތަންތަން ހިއްކުމަށް ކަނޑައަޅާފައިވާ މިންވަރަށްވުރެ އިތުރަށް ބިން ހިއްކުމަށް ތައްޔާރުވަމުން އަންނަ ކަމަށް ވެސް ރައީސް ޑރ. މުޢިއްޒު ވިދާޅުވިއެވެ.
