އެކި މީހުންނަށް ދިރިއުޅުމުގައި ތަޖުރިބާކުރަންޖެހޭނީ އެކި ކަންކަން ކަމަށާއި އެއީ ނިކަމެތިކަމެއް ނޫން ކަމަށް ފަސްޓް ލޭޑީ ސާޖިދާ މުޙައްމަދު ވިދާޅުވެއްޖެއެވެ.
މެޑަމް ސާޖިދާ މި މޭރުމުން ވިދާޅުވީ، ޑައުންސިންޑްރޯމް ދުވަހާއި ގުޅިގެން އެކްސްގައި ޙިއްޞާކުރެއްވި ޕޯސްޓެއްގައެވެ. އެކަމަނާ ޙިއްޞާ ކުރެއްވި ޕޯސްޓުގައި ވިދާޅުވީ، ކޮންމެ މީހަކުވެސް ދިރިއުޅުން ތަޖުރިބާކުރާ ގޮތް ތަފާތު ކަމަށެވެ. ނަމަވެސް އެއީ ނިކަމެތިކަމެއް ނޫން ކަމަށާއި އެއީ މި ދުނިޔޭގެ ރީތިކަމާއި ފުރިހަމަކަން އިތުރުކޮށްދޭ ކަމެއް ކަމަށް އެކަމަނާ ވިދާޅުވިއެވެ.
ޢާންމު ގޮތެއްގައި ޑަައުންސިންޑްރޯމް ހުންނަ ފަރާތްތަކަކީ މުޖުތަމަޢުގެ ތެރެއިން ބާކީވުމާއި އެކަނިވެރިކަމުގެ އިހުސާސްތަކާ ކުރިމަތިލާންޖެހޭ ބައެއްކަން ފާހަގަކުރައްވަމުން މެޑަމް ސާޖިދާ ވިދާޅުވީ، އެ ފަރާތްތަކަކީ އެފަދަ ހުރިހާ ގޮންޖެހުންތަކާ އެކުގައިވެސް ލޯތްބާއި، އޯގާތެރިކަމާއި، އަދި ކަންކަމުގައި ސާބިތުކަން ދައްކުވައިދޭ ނަމޫނާ ބައެއް ކަމަށެވެ.
ދުނިޔޭގެ ޑައުންސިންޑްރޯމް ދުވަސް ފާހަގަކުރަމުންދާއިރު، ކޮންމެ މީހަކީވެސް މުޖުތަމަޢުގައި ބަލައިގަންނަ، އަގުވަޒަންކުރެވޭ އަދި އެކުވެރިކަމާއެކު އުޅުމުގެ ޖާގަ ލިބިފައިވާ ބަޔަކަށް ހެދުމަށް އަޒުމް ކަނޑައަޅަންޖެހޭ ކަމަށް މެޑަމް ސާޖިދާ ވިދާޅުވިއެވެ. އެކަމަނާ ވިދާޅުވީ، އެއްވެސް މީހަކީ ބާކީވެފައިވާ މީހެއް ކަމުގެ އިހުސާސް ނުކުރެވޭނެ ފަދަ މާޙައުލެއް ބިނާކުރުމަށް މަސައްކަތް ކުރުމަކީ އެންމެންގެވެސް ޒިންމާއެއް ކަމަށެވެ.
މީގެ އިތުރުން، މުޖުތަމަޢުގައި އެކުވެ އުޅުމުގެ ފުރުޞަތު ލިބުމަކީ ކޮންމެ މީހަކަށްވެސް ލިބިގެންވާ ޙައްޤެއް ކަމަށް މެޑަމް ސާޖިދާ ވަނީ އިތުރަށް ވިދާޅުވެފައެވެ.
