ޢުމްރާގެ އަޅުކަން އަދާކުރުމަށް ސަޢޫދީ ޢަރަބިއްޔާއަށް ގޮސް އުޅުނު ދިވެއްސަކު ނިޔާވެއްޖެއެވެ.
ޢުމްރާގެ އަޅުކަން އަދާކުރުމަށް ސަޢޫދީއަށް ގޮސް އުޅެނިކޮށް ނިޔާވެފައިވަނީ މ. ވެލިވަނި އިބްރާހިމް ރަަޝީދެވެ. އޭނާ ނިޔާވެފައި ވަނީ ރަމަޟާން މަހުގެ ޢުމްރާގެ އަޅުކަމަށް ގޮސް އުޅެނިކޮށް ރޭގެ ވަޤުތެއްގައި މައްކާގައެވެ. އޭނާ ޢުމްރާގެ އަޅުކަމަށް ގޮސްއުޅެނީ، ކޮން ޢުމްރާ ގުރޫޕެއްގެ ޙަވާލުގައި ކަމެއް އަދި ސާފެއް ނުވެއެވެ.
އިބްރާހިމް ރަޝީދުގެ ޖަނާޒާ ރޭ ފަތިހު ނަމާދަށްފަހު މަސްޖިދުލް ހަރާމްގައި ވަނީ ބާއްވައިފައެވެ.
ފާހަގަކޮށްލަންޖެހޭ ގޮތުގައި މީގެ ހަފްތާއެއްހައި ދުވަސްކުރިން ވެސް ދިވެހި ޢުމްރާވެރިއަކު މައްކާގައި ވަނީ ނިޔާވެފައެވެ. އެއީ ހިޖާޒް ޙައްޖު އެންޑް ޢުމްރާ ގްރޫޕްގެ ޙަވާލުގައި ޢުމްރާގެ އަޅުކަމަށް ގޮސް އުޅުނު ގދ. ނަޑެއްލާއަށް ނިސްބަތްވާ ޢަލީ އިބްރާހީމް ދީދީއެވެ. އޭނާގެ ޖަނާޒާ ވެސް ވަނީ މަސްޖިދުލް ހަރާމްގައި ބާއްވައިފައެވެ.
ރަމަޟާން މަހާއި ދިމާކޮށް ޢުމްރާގެ އަޅުކަން އަދާކުރުމަށް ރާއްޖެއިން 2،000 އަށްވުރެ ގިނަ ފަރާތްތަކުން މި އަހަރު ސަޢޫދީ އަރަބިއްޔާއަށް ގޮސްފައިވެއެވެ.
