އަނިޔާގެ ސަބަބުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ޤައުމީ ޓީމުން އުނިކޮށްފި އެވެ.
ރޮނާލްޑޯ ޓީމުން އުނިކޮށްފައިވާއިރު އަނިޔާގެ ސަބަބުން އޭނާ ކުޅުމާ ދުރުގައި ހުންނަތާ މަހެއްހާ ދުވަސްވެއްޖެއެވެ. ރޮނާލްޑޯއަށް މި އަނިޔާ ވެފައިވަނީ ސައޫދީ އަރަބިއާގެ އަލް- ނަސްރަށް ކުޅެނިކޮށެވެ. އަދި އަނިޔާއަށް އޭނާ ފަރުވާ ހޯދަމުންދަނީ ސްޕޭނުގަ އެވެ.
މިކަމާއި ގުޅިގެން ޕޯޗުގަލްގެ ކޯޗު ރޮބާޓޯ މާޓިނޭޒް ބުނީ އެމެރިކާ އާއި މެކްސިކޯއާ ދެކޮޅަށް ކުޅޭ ދެ މެޗުގައި ނުކުޅަނަސް ޖޫން މަހު އޮންނަ ވޯލްޑް ކަޕް ސްކޮޑުގައި ރޮނާލްޑޯ ހިމަނާނެ ކަމަށެވެ.
”އޭނާ މިވަގުތު ޓީމުގައި ނެތީ އެންމެނަށް ވެސް އެނގޭ ކަމެއްގައި. އޭނާ ފިޓެއް ނޫން. އަހަރުމެންނަށް މި ދެ މެޗަކީ އެހެން ކުޅުންތެރިން ތަޖުރިބާ ކޮށްލަން ލިބޭ ފުރުސަތެއް،“ ކޯޗު ބުންޏެވެ.
ރޮނާލްޑޯގެ އިތުރުން ބްރެޒިލްގެ ކީޕަރު އަލިސަން ބެކާ ވެސް އަނިޔާގެ ސަބަބުން ޤައުމީ ޓީމުން ވަނީ އުނިކޮށްފައެވެ.
