ގުރޫޕަކުން އައިސް ސައިކަލުން ޖައްސާ، ހުޅުމާލެ އުތުރު ދާއިރާގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުކަމަށް އިދިކޮޅު އެމްޑީޕީން ވާދަކުރައްވާ ފާތިމަތު ޝިބާ އަށް ބޮޑެތި އަނިޔާތަކެއް ދީފި ކަމަށް ބުނެ ”ރާއްޖެ އެމްވީ“ އިން ފަތުރާފައި ވަނީ ދޮގު ޚަބަރެއް ކަމަށް ދިވެހި ފުލުހުންގެ ޚިދުމަތުން ބުނެފިއެވެ.
”ގުރޫޕަކުން އައިސް ސައިކަލުން ޖައްސާ، އެމްޑީޕީ ކެންޑިޑޭޓް ޝިބާ އަށް ބޮޑެތި އަނިޔާތަކެއް ދީފި“ މިސުރުޚީގެ ދަށުން ރާއްޖެ އެމްވީގައި ރިޕޯޓުކޮށްފައިވާ ޚަބަރުގައި ބުނެފައި ވަނީ ކެމްޕޭން ހަރަކާތެއް ނިންމަވާލެއްވުމަށްފަހު ޝިބާ ވަޑައިގަންނަވަނިކޮށް، ބަޔަކު ގަސްތުގައި ސައިކަލުން ޖައްސައި ބޮޑެތި އަނިޔާތަކެއް ދީފައިވާ ކަމަށެވެ.
މި ޚަބަރާއި ގުޅިގެން ފުލުހުންގެ މީޑިއާ ގްރޫޕުގައި ނޫސްވެރިޔަކު ކުރި ސުވާލެއްގެ ޖަވާބުގައި ފުލުހުން ބުނީ ޝިބާގެ އެކްސިޑެންޓާއި ގުޅޭގޮތުން ފަތުރާފައިވަނީ ދޮގު ޚަބަރެއް ކަމަށެވެ.
ފުލުހުން ބުނީ ހުޅުމާލެ ފޭސް 2 ގައި 2026 މާރިޗު 19 ވަނަ ދުވަހު ހިނގި އެކްސިޑެންޓަކާ ގުޅޭގޮތުން ސޯޝަލް މީޑިއާގައާއި ބައެއް ނޫސްތަކުގައި ފަތުރަމުންދަނީ ސައްހަ ނޫން ބައެއް މައުލޫމާތުތައް ކަމަށެވެ.
އެގޮތުން މި އެކްސިޑެންޓް ހިނގި ސަރަހައްދުން ލިބިފައިވާ މައުލޫމާތަށް ބަލާއިރު، މިއީ 2026 މާރިޗު 19 ވަނަ ދުވަހުގެ ހަވީރު 17:25 އެހައިކަންހާއިރު ދެ ސައިކަލު ޖެހިގެން ހިނގާފައިވާ އެކްސިޑެންޓެއް ކަމަށް ފުލުހުން ބުނެފައިވެއެވެ. އަދި ބައެއް މީޑިއާތަކުގައި ރިޕޯޓްކޮށްފައިވާ ފަދައިން، މިއީ ވަކި މަގުސަދެއް އޮވެގެން ގަސްދުގައި މީހަކަށް ދިން ހަމަލާއެއް ކަމަށް ނުބެލެވޭ ކަމަށާއި، އަދި މިއީ އެކްސިޑެންޓްވުމަށްފަހު ފިލައިގެން ދިޔަ ހާދިސާއެއް ނޫންކަންވެސް ފުލުހުން ވަނީ ފާހަގަކޮށްފައެވެ.
ފުލުހުން އިތުރަށް ބުނީ މި އެކްސިޑެންޓް ހިނގާފައިވަނީ، ހުޅުމާލެ ފޭސް 2، ހިތިގަސްމަގުން ދުއްވާފައިދިޔަ ސައިކަލެއް ފޭރުގަސްމަގު 2 ނަންބަރު ގޯޅި އަށް އަޅަން އުޅުނު ވަގުތު، ހިތިގަސްމަގުން ދުއްވާފައި ދިޔަ އެހެން ސައިކަލެއް ޖެހިގެން ކަމަށެވެ. އަދި މި އެކްސިޑެންޓް ހިނގި ވަގުތު ފުލުހުން ވަނީ އެ ސަރަހައްދަށް ގޮސް ސީން އިން ބޭނުންވާ މައުލޫމާތާއި އެކްސިޑެންޓްގައި ހިމެނޭ ފަރާތްތަކުގެ މައުލޫމާތު ނަގާފައި ކަމަށްވެސް ފުލުހުން ވަނީ ބުނެފައެވެ.
މި އެކްސިޑެންޓްގައި އަނިޔާވި މީހާއަށް ފަރުވާ ދިނުމަށްޓަކައި ހޮސްޕިޓަލަށް ގެންގޮސްފައިވާކަމަށާއި، މި މައްސަލަ ފުލުހުން ތަހުގީގު ކުރަމުން ގެންދާކަން ހާމަކުރިއެވެ.
ރާއްޖެ އެމްވީ އިން މި ފެތުރި ދޮގު ޚަބަރާއި ގުޅިގެން އެ ނޫހުން މިހާތަނަށް ޖަވާބުދާރީ ވެފައި ނުވެއެވެ. މިކަމަށް އިޝާރާތްކުރައްވާ ފުުލުހުން ވަނީ ރައްޔިތުންގެ މެދުގައި ނުތަނަވަސްކަން އުފެދޭ ފަދަ ސައްހަނޫން މައުލޫމާތު ނުފެތުރުމަށް މީޑިއާތަކަށާއި އާންމުންނަށް އިލްތިމާސްކޮށްފައެވެ.
މީގެ އިތުރުން ފުލުހުންގެ ތަރުޖަމާނު އަދި އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝިފާން ވެސް ވަނީ ރާއްޖެ އެމްވީގެ ޚަބަރު ދޮގު ކުރައްވާފައެވެ. ޝިފާންވެސް ވިދާޅުވީ އެކްސިޑެންޓް ހިނގިކަމާއި، ޚާބަރުގައިވާފަދައިން ގަސްދުގައި ދިން ހަމަލާއެއްކަން ފާހަގަކުރެވިފައި ނުވާ ކަމަށެވެ. އަދި އެކްސިޑެންޓަށްފަހު އެއްވެސް މީހަކު ސީން އިން ފިލައިގެން ގޮސްފައިނުވާ ކަން ޝިފާން ފާހަގަކުރެއްވިއެވެ.
The incident in Hulhumalé Phase 2 on 19 March at around 17:25 hrs was a traffic accident involving two motorcycles.
This was not a deliberate attack nor a hit-and-run. One person was injured and taken to hospital for treatment.The incident is under police investigation.
— Ahmed Shifan (@Shifan4040) March 19, 2026
ރާއްޖެއެމްވީ އިން މިފަދަ ހައްސާސް ކަމެއްގައި ދޮގު ޚަބަރެއް ގެނައުމާއި ގުޅިގެން މީޑިއާ ކޮމިޝަނުން އަދި ވަކި އެއްޗެއް ވިދާޅުވެފައި ނުވެއެވެ.
