ސިޔާސީ ޕާޓީތަކުންނާއި ކެންޑިޑޭޓުން ވޯޓަރސް ލިސްޓުގައި ސޮއިކުރުމަށް އިތުރު އެއް ދުވަސް ދިނުމަށް އިލެކްޝަންސް ކޮމިޝަން (އީސީ) އިން ނިންމައިފިއެވެ.
މިކަމާ ގުޅިގެން އީސީން ބުނެފައިވަނީ އިންތިޚާބާ ބެހޭ މަރުކަޒާއި އިންވެގެން ހުރި ކެމިކަލް ގުދަނުގައި ހިނގި އަލިފާނުގެ ހާދިސާއާ ގުޅިގެން، އެ މަރުކަޒު މަސައްކަތްތައް ވަގުތީ ގޮތުން ސޯޝަލް ސެންޓަރަށް ބަދަލުކޮށް، ސިޔާސީ ޕާޓީތަކުންނާއި ކެންޑިޑޭޓުންގެ ފަރާތުން ވޯޓު ދިނުމުގެ ޙައްޤު ލިބިގެންވާ މީހުންގެ ފައިނަލް ރަޖިސްޓަރީގައި ސޮއިކުރުމުގެ މަސައްކަތް އިއްޔެ ހެނދުނު 10:00 ގައި ފަށާފައިވާ ކަމަށެވެ.
އަލިފާނުގެ ހާދިސާއާ ގުޅިގެން ލިސްޓުގައި ސޮއިކުރުމަށް އިތުރު ފުރުޞަތެއް ދިނުމުގެ ގޮތުން 21 މާރިޗު 2026 ވާ ހޮނިހިރު ދުވަހުގެ ހެނދުނު 10:00 އިން ފެށިގެން މެންދުރުފަހު 13:00 ގެ ނިޔަލަށް ސޯޝަލް ސެންޓަރުގައި ސޮއިކުރުން ކުރިއަށްގެންދިއުމަށް ހަމަޖެހިފައިވާ ކަމަށް އީސީން ވަނީ ބުނެފައެވެ.
މި މަސައްކަތަށް އެއްދުވަސް އިތުރު ކުރި ނަމަވެސް، މި ރަޖިސްޓަރީގައި ސޮއިކުރުމުގެ މަސައްކަތް ކުރިއެކޭ އެއްގޮތަށް، ސޯޝަލް ސެންޓަރުގައި ކުރިއަށްދާނެ ކަމަށާއި އިންތިޚާބާ ބެހޭ މަރުކަޒު ހުރި ސަރަޙައްދުގައި އަލިފާނުގެ ހާދިސާއެއް ހިނގާފައި ވީނަމަވެސް އިންތިޚާބުގެ ތާވަލްގައި ވާ ގޮތަށް ހުރިހާ މަސައްކަތްތަކެއްވެސް ހުއްޓުމެއް ނެތި ކުރިއަށްދާ ކަމަށް އީސީން އިތުރަށް ބުނެފައިވެއެވެ.
