ދިވެހިރާއްޖެއާއި އޮސްޓްރޭލިއާއާ ދެމެދު ސީދާ ވައިގެ ދަތުރުތައް ފެށުމަށް އެއްބަސްވުމެއްގައި އިއްޔެ ސޮއިކޮށްފިއެވެ.
މިކަން ހާމަކުރެއްވީ ޓްރާންސްޕޯރޓް މިނިސްޓަރު މުޙައްމަދު އަމީން އެކްސްގައި ޙިއްޞާކުރެއްވި ޕޯސްޓެއްގައެވެ. މިނިސްޓަރު ވިދާޅުވީ، ރާއްޖެއާއި އޮސްޓްރޭލިއާގެ އޭވިއޭޝަން ދާއިރާގެ އިދާރާތަކުން އެއްބަސްވުމެއްގައި ސޮއިކޮށްފައިވާ ކަމަށެވެ. މި އެއްބަސްވުމަކީ ދެ ޤައުމުގެ ދެމެދުގައިވާ ”ބައިލެޓަރަލް އެއާ ސަރވިސަ އެގްރީމަންޓް“ އިތުރަށް ކުރިއެރުވުމަށް އެޅުނު މުހިންމު ފިޔަވަޅެއް ކަމަށްވެސް މިނިސްޓަރު ވަނީ ވިދާޅުވެފައެވެ.
މިނިސްޓަރު އިތުރަށް ވިދާޅުވީ، މިއަދުން ފެށިގެން ރާއްޖެއާއި އޮސްޓްރޭލިއާ ދެމެދު އެއަރލައިންތަކުން ދަތުރުތައް ކުރުމަށް އެއްވެސް ހުރަހެއް ނޯންނާނެ ކަމަށެވެ. މިކަމުގެ ސަބަބުން ދަތުރުފަތުރާއި، ފަތުރުވެރިކަމާއި، އަދި ވިޔަފާރީގެ ދާއިރާއިން އައު ފުރުޞަތުތަކެއް ހުޅުވިގެންދާނެ ކަމަށްވެސް މިނިސްޓަރު ވަނީ ފާހަގަކުރައްވައިފައެވެ.
The Aeronautical Authorities of Australia and the Maldives have signed an MoU to advance a Bilateral Air Services Agreement between our two countries.
Effective today, there are no restrictions for airlines to operate between Australia and the Maldives—opening new opportunities… pic.twitter.com/RHFyMRP3Ir
— Mohamed Ameen (@ameen3d) March 19, 2026
މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މޯލްޑިވްސް ސިވިލް އޭވިއޭޝަން އޮތޯރިޓީ (ސީއޭއޭ) ގެ ބޯޑުގެ ޗެއަރމަން ޢަބްދުލް ހާރިސްއެވެ. އޮސްޓްރޭލިއާ ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޑިޕާޓްމަންޓް އޮފް އިންފްރާސްޓްރަކްޗަރ، ޓްރާންސްޕޯޓް، ރީޖަނަލް ޑިވެލޮޕްމަންޓް، ކޮމިއުނިކޭޝަންސް، ސްޕޯޓް އެންޑް ދި އާޓްސްގެ އެސިސްޓަންޓް ސެކްރެޓަރީ ފޯރ އިންޓަރނޭޝަނަލް އޭވިއޭޝަން ޖިމް ވޯލްފްއެވެ.
މިކަމާ ގުޅިގެން ސީއޭއޭ އިން ބުނެފައިވާ ގޮތުގައި، މިއީ ރާއްޖެއާއި އޮސްޓްރޭލިއާއާ ދެމެދު އޮތް ޒަމާންވީ ގާތް ގުޅުން ރަމްޒުކޮށްދޭ ކަމެކެވެ. އަދި މިއީ ދެ ޤައުމުގެ ދެމެދުގައި ވައިގެ ދަތުރުފަތުރުގެ ގުޅުން އިތުރަށް ވަރުގަދަކުރުމަށް ކުރެވޭ މަސައްކަތުގެ ތެރެއިން ލިބުނު ބޮޑު ކުރިއެރުމެއް ކަމަށް އެ އޮތޯރިޓީން ވަނީ ބުނެފައެވެ.
Today, the Maldives and Australia signed a Memorandum of Understanding (MoU) to establish and facilitate commercial air services between the two countries.
The MoU was signed on behalf of the Maldives by Mr. Abdul Haris, Chairman of the Board of Maldives Civil Aviation Authority pic.twitter.com/3BkPCfZX9e
— Maldives Civil Aviation Authority (@CAA_mv) March 19, 2026
ރާއްޖޭގެ ދަތުރުފަތުރުގެ ނިޒާމު މިހާރަށްވުރެ ބޮޑަށް ހަރުދަނާ ކުރުމަކީ ސަރުކާރުގެ އަމާޒެއް ކަމަށްވާއިރު ދަތުރުފަތުރުގެ ނިޒާމު މިހާރަށްވުރެ ބޮޑަށް ހަރުދަނާކުރުމަށް ސަރުކާރުން ގެންދަނީ ވަރަށް ގިނަ މަސައްކަތްތަކެއްވެސް ކުރަމުންނެވެ.
