މި އަހަރުގެ ފިޠުރު ޢީދު ނަމާދު، މާލޭ ސިޓީގެ އެކި ސަރަޙައްދުތަކުގައި ބޮޑު ޖަމާޢަތުގައި ކުރުމަށް ހަމަޖެހިފައިވާތީ، މާލޭގެ ބައެއް މަގުތައް ބަންދުކުރަން ނިންމައި. އެ މަގުތަކުގައި ޕާކުކޮށްފައި ހުރި އުޅަނދުތައް ނަގަން ފުލުހުން އަންގައިފިއެވެ.
މިކަމާ ގުޅިގެން ފުލުހުން އެކްސްގައި ޙިއްޞާކޮށްފައިވާ ޕޯސްޓެއްގައި ބުނެފައިވަނީ، މި އަހަރުގެ ފިޠުރު ޢީދު ނަމާދަށް އިސްލާމީ މަރުކަޒާއި، ސަލްމާން މިސްކިތުގެ އިތުރުން މާފަންނު ސްޓޭޑިއަމް ހިމެނޭ ސަރަޙައްދުގެ ޓްރެފިކް ފްލޯއަށް ބަދަލު ގެންނަން ނިންމާފައިވާ ކަމަށެވެ.
ފުލުހުން ވަނީ އިސްލާމީ މަރުކަޒު ކައިރިން އަމީރު އަޙްމަދު މަގުގެ ޖުމްހޫރީ މައިދާނާއި އިސްލާމީ މަރުކަޒާ ދެމެދުގައި އޮންނަ ފަޅީގައި ޕާކުކުރުން މަނާކޮށްފައެވެ. މީގެ އިތުރުން ސަލްމާން މިސްކިތުގެ ގޭޓު ހިމެނޭ ސަރަޙައްދާއި، ހިލާލީ މަގު އެސްޓީއޯ ލޭބަރ ކުއާޓަރ އިން ފެށިގެން މިފްކޯ މަސް ފިހާރައާ ދިމާލުގައިވެސް ޕާކުކުރުން ފުލުހުން ވަނީ މަނާކޮށްފައެވެ.
އެ ސަރަޙައްދުތަކުގައި ޕާކުކޮށްފައިވާ އުޅަނދުތައް އިއްޔެ ހަވީރު 15:00 ގެ ކުރިން އެ ތަނުން ނެގުމަށް ފުލުހުން ވަނީ އުޅަނދުތަކުގެ ވެރިފަރާތްތަކަށް އަންގައިފައެވެ.
މާލެ ސަރަޙައްދުގެ ޖުމްލަ 24 މިސްކިތެއްގައި މި އަހަރުގެ ފިޠުރު ޢީދު ނަމާދު ކުރުމަށް ހަމަޖެހިފައިވާއިރު ބޮޑު ޖަމާޢަތުގައި ހަތަރު ސަރަޙައްދެއްގައި ފިޠުރު ޢީދު ނަމާދު ކުރުމަށް ވަނީ ހަމަޖެހިފައެވެ.
