މާފަންނުގައި ހުރި ކެމިކަލް ގުދަނެއްގައި ރޭ ހިނގި އަލިފާނުގެ ހާދިސާގައި އެ ސަރަޙައްދުގައި ހުރި 15 ގެޔަކުން ޖުމްލަ 454 މީހުން އިވަކުއޭޝަން ސެންޓަރުގައި ރަޖިސްޓްރީ ކުރެވުނު ކަމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
މި ހާދިސާ ހިނގާފައިވަނީ ޢިއްޒުއްދީން މަގާއި ފުލޫނިޔާ މަގު ގުޅުނު ކަންމަތީގައި ކުރީގެ ޑްރަގް ކޯޓާ އިންވެގެން ހުރި ޕްރައިމް ނަމަކަށް ކިޔާ ކެމިކަލް ގުދަނެއްގައެވެ. އެމްއެންޑީއެފް އިން ބުނެފައިވާ ގޮތުގައި ރޭ 21:45 އެހައިކަންހާއިރު ރޯވި މި އަލިފާންގަނޑު އެއްކޮށް ނިއްވާލެވުނީ ފަތިހުގެ ވަގުތުގައި ކަމަށެވެ.
މި ހާދިސާގައި ރޭ ދަންވަރު 2:30 އާއި ހަމައަށް 15 ގެއަކުން 454 މީހުން އިވަކުއޭޝަން ސެންޓަރުގައި ރަޖިސްޓްރީ ކޮށްފައިވާ ކަމަށާއި، އެއީ 69 އަންހެނުންނާއި 385 ފިރިހެނުން ކަމަށް އެންޑީއެމްއޭ އިން ވަނީ މަޢުލޫމާތު ދީފައެވެ. މީގެ އިތުރުން ވަގުތީ ގޮތުން އެހީތެރިކަން ބޭނުންވާ 10 ގެއެއްގެ 77 މީހަކަށް އެންޑީއެމްއޭ އިން ވަގުތީ ބޯހިޔާވަހިކަން ފޯރުކޮށްދީފައިވާ ކަމަށް އެ އޮތޯރިޓީން ވަނީ ބުނެފައެވެ.
އިވަކުއޭޝަން ސެންޓަރުގައި ރަޖިސްޓްރީ ކޮށްފައިވާ 454 މީހުންގެ ތެރެއިން 302 މީހުންނަކީ މަސައްކަތްތެރިން ކަމަށާއި އޭގެ ތެރެއިން 280 ބިދޭސީއަކާ އެ މީހުންގެ ވެރިފަރާތުން ޙަވާލުވެފައިވާ އެންޑީއެމްއޭ އިން ބުންޏެވެ. މީގެ އިތުރުން 20 ބިދޭސީއަކަށް ދިވެހި ރެޑްކްރެސެންޓުން އެހީތެރިކަން ފޯރުކޮށްދީފައިވާ ކަމަށްވެސް އެ އޮތޯރިޓީން ވަނީ ބުނެފައެވެ.
މި ހާދިސާގެ ސަބަބުން ބައެއް ޢާއިލާތަކުން ވަގުތީ ގޮތުން ޢާއިލީ ގޭގެއަށް ބަދަލުވެފައިވާއިރު، ހުސްކުރަންޖެހުނު 15 ގެވެސް ހުސްކުރަން ޖެހުނީ ބޯދުމުގެ ސަބަބުން ކަމަށް އެންޑީއެމްއޭއިން ވަނީ ބުނެފައެވެ. މީގެ އިތުރުން އަލިފާނުގެ އަސަރުކޮށްގެން ހަތް މީހަކަށް ހޮސްޕިޓަލުން ފަރުވާދެވުނު ކަމަށާއި އެ ހުރިހާ އެންމެންގެ ޙާލު ރަނގަޅު ކަމަށް އެ އޮތޯރިޓީން ބުންޏެވެ.
އަލިފާނުގެ ހާދިސާ ހިނގި މި ގުދަނަކީ އެކި ބާވަތްތަކުގެ ގަސްކާނާއާއި، ޕެސްޓިސައިޑްސްއާއި، ދަނޑުވެރިކަމަށް ބޭނުންކުރާ ސާމާނުގެ އިތުރުން ޖަނަރޭޓަރެއްވެސް ހުރި ގުދަނެކެވެ. މި ހާދިސާގައި އެ ގުދަން ވަނީ ބޭނުންނުކުރެވޭ ވަރަށް އެއްކޮށް ހަލާކުވެފައެވެ.
